УИХ-ын гишүүн асан Н.Номтойбаяр хорих ангиас өнөөдөр суллагджээ. Тэрээр 2020 оны тавдугаар сарын 28-ны өдөр цагдан хоригдсон билээ.
Шүүхээс Н.Номтойбаярыг Хөдөлмөр нийгмийн хамгааллын сайд, Хөдөлмөр эрхлэлтийн үндэсний зөвлөлийн даргаар ажиллаж байхдаа “Орон нутаг, нийслэлийн онцлог хэрэгцээнд нийцүүлсэн зорилтот төсөл, хөтөлбөр”-ийн хэрэгжилтэд зохих хяналтыг тавиагүй, эрхэлсэн ажилдаа хайнга хандсан нь Эрүүгийн хуулийн 23.5 дугаар зүйлийн 1 дэх хэсэгт заасан гэмт хэргийн шинжийг агуулсан гэж үзэн хоёр жил нийтийн албанд томилогдох эрхийг хасаж, нэг жилийн хорих ял оноосон юм.
Хуулиар хэргийг шалгах явцад цагдан хоригдсон хугацааг ялын хэмжээнд оруулан тооцдог. Энэ дагуу Н.Номтойбаярын цагдан хоригдсон, ял эдэлсэн хугацаа өнөөдөр дуусгавар болсон байна.
