Г.Ариунбуян: Амиа алдсан алба хаагчид 10 жилийн цалингийн дундажтай тэнцэх хэмжээний тэтгэмж олгоно

Хан-Уул дүүрэгт  өчигдөр буюу арванхоёрдугаар сарын 19-ний өдөр гал түймэр гарч, долоон иргэн амиа алдсан билээ. Түүнчлэн ОБЕГ-ын нэг алба хаагч харамсалтайгаар албан үүргээ гүйцэтгэж байгаад амиа алдсан. Тэгвэл уг асуудалтай холбоотойгоор ОБЕГ-ын дарга Г.Ариунбуян мэдээлэл өглөө.

Онцгой байдлын ерөнхий газрын дарга, хошууч генерал Г.Ариунбуян: Энэ гал унтраах ажиллагааны үед манай гал унтраах 14 дүгээр ангийн салааны захирагч залуу харамсалтайгаар амь насаа алдлаа. Ер нь, онцгой байдлын албан хаагчид ямар нэг тактикийн болон албаны алдаа гаргаагүй. Яг хууль журмын дагуу үүргээ гүйцэтгэсэн. Тухайн орон сууцад 100 гаруй өрх амьдардаг. Урьдчилсан байдлаар цагдаагийн байгууллага, шинжээчдийн бүлэг ажиллахад гацуур модны чимэглэлээс галын эрсдэл үүссэн. Иргэддээ хандаж хэлэхэд өвлийн улиралд галын аюулгүй байдлыг хангах, гацуур модыг чимэглэж тавихдаа тодорхой цагийн хязгаарлалттай байлгах, шөнө гацуур модны чимэглэлийг үргэлжлүүлэн асаахгүй байх тал дээр сонор сэрэмжтэй байхыг зөвлөж байна.

Гал унтраах ажиллагаан дээр ажиллаж байгаа албан хаагчийн хувцас хэрэглэл, техник бүрэн хангагдсан. Хорт хийн утааны баг, амьсгалын бие даасан төхөөрөмж,  гал унтраах хэрэгслийг бүрэн ашиглаж байна. Манай алба хаагчийн хувьд дээд давхрын айл өрхүүдийнг аюулгүй байдалд шилжүүлэх, утаажилтын бүсээс гаргаж байх явцдаа харамсалтайгаар ухаан алдсан. Үүний дараа эмнэлэгт хүргэгдэж амь насаа алдсан. Энэхүү алба хаагчийн тухайд удам дамжсан аврагч байгаа. Аврагч, гал сөнөөгчөөс эхлээд ажил мэргэжлээ сонгосон 27 настай залуу юм. Бид холбогдох хуулийн дагуу мөнгөн тэтгэмж олгоно. Мөн амь насны даатгал, оршуулгын зардлыг онцгой байдлын газраас хариуцаж олгож байгаа.  Гамшгаас хамгаалах тухай хуулийн дагуу албан үүргээ гүйцэтгэж байгаа амь насаа алдсан албан хаагчид 10 жилийн үндсэн цалингийн дундажтай тэнцэх хэмжээний нэг удаагийн тэтгэмж олгохоор хуульчлагдсан байдаг гэлээ.