С.АМАРСАЙХАН: Малчдын бойлсон махыг зах зээлд нийлүүлэх чиглэлээр 100 тэрбум төгрөг гаргахаар шийдвэрлэлээ

Засгийн газраас гаргасан шийдвэрийн талаар УОК-ын дарга, Шадар сайд С.Амарсайхан өнөөдөр мэдээлэл өглөө.

–  Өнөөдрийн байдлаар 10 гаруй аймгийн 90 гаруй сум цагаан зудтай байна. Малчдын амьдрах ахуй нөхцөл байдал хүндэрч байна. Цаашдаа ч улам хүндрэх эрсдэл өндөр байна. 

– Эрчим хүч, дулааны эх үүсвэрийн найдвартай арга хэмжээг авч хэрэгжүүлэх, ханиад томууны асуудалтай холбоотой эрүүл мэндийн үйлчилгээг иргэдэд түргэн шуурхай зохион байгуулах үүрэг бүхий ажлын хэсгийг байгууллаа. 

– Засгийн газрын хуралдаанаар өнгөрсөн 7 хоногт малчдын бойлсон махыг зах зээлд нийлүүлэх, мах боловсруулах үйлдвэрүүдийг дэмжих чиглэлээр 100 тэрбум төгрөг гаргахаар шийдвэрлэсэн. Малчдаас мах авах ажлыг эрчимжүүлнэ.

– Өвөлжилтийн нөхцөл байдал хүндэрч байгаатай холбогдуулан малын тэжээл, өвсний хомсдол үүсэж байна.  Тиймээс малын тэжээл экспортлохыг 2024 он дуустал зогсоох шийдвэр гаргалаа. 

– Тэжээлийн үйлдвэрүүдтэй хамтарч малчдад үйлдвэрийн үнээр малын тэжээлийг нийлүүлэх ажил хийгдэж байна.

– Ханиад томууны тухайд эмнэлгийн ачаалалд анхаарах, эм тарианы нөөцийг бүрдүүлэх асуудлууд өнөөдрийн Засгийн газрын хуралдаанаар яригдлаа. 

УОК Шуурхай штаб бүрэн бүрэлдэхүүнээрээ ажиллаж байна. Өвөлжилтийн нөхцөл байдалтай холбогдуулан бүх салбарын үйл ажиллагааг хэвийн явуулахаар байнгын холбоотой ажиллаж байна” гэв.