“2020 онд дүүргийн Засаг даргын ажлыг авсан даруйдаа баг хамт олонтойгоо тохижилт, бүтээн байгуулалтын ажлаас илүүтэй эмхлэх, цэгцлэх ажлуудыг эхлүүлсэн”

2020 онд дүүргийн Засаг даргын ажлыг авсан даруйдаа баг хамт олонтойгоо тохижилт, бүтээн байгуулалтын ажлаас илүүтэй эмхлэх, цэгцлэх ажлуудыг эхлүүлсэн.

Тухайлбал нийтийн эдэлбэр газарт зөвшөөрөлгүй тавьсан гараашуудыг буулгаж ногоон байгууламж, сандал сүүдрэвч, зогсоол хийх. Орц гарц хаасан хашаа хайсыг чөлөөлөх. Автобусны буудал орчмын ТҮЦ-үүдийг цэгцлэх гэх мэт.. Эдгээрээс гарааш буулгалт, орц гарц нээж хашааг буулгах зэрэг ажлууд үр дүнтэй явааг та бүхэн мэднэ. Харин ТҮЦ цэгцлэх ажлууд маргаан дагуулсаар…

Тиймээс ТҮЦ эрхлэгчидтэй уулзаж дүүргийн бодлого, шийдвэр, зорилтын талаар танилцуулж санал солилцлоо.

1. Төв зам дагуух автобусны буудлын бүх ТҮЦ-үүдийг цэгцэлнэ. Автобусанд очерлож буй хүүхдүүд брожур дээр зогсдог, автобуснаасаа буугаад шууд ТҮЦ мөргөдөг байж болохгүй.

2. ТҮЦ хөгжвөл хөгжих цаг хугацаа хангалттай өнгөрсөн. Гэтэл өнөөдрийг хүртэл бахь байдгаараа… Эргэн тойрны орчны бохирдол, ил задгай худалдаалж буй пирошки, кимбаб зэрэг нь эрүүл ахуйн шаардлага хангаж байгаа үгүй нь мэдэгдэхгүй чигээр явсаар байна. Одоо бид нэг шат ахих хэрэгтэй. Автобусны буудлаа автобусны буудал шиг тохижуулж, иргэд нь аюулгүй орчинд зорчдог ийм больё.

3. Мэдээж ТҮЦ эрхлэгч гэдэг хүн. Цаана амьдралтай. Ар гэр бүлтэй. Орлого олсон мөнгөөрөө үр хүүхдээ тэжээж, боловсрол эзэмшүүлж, амьдралаа залгуулж яваа. Иймд манай баг бизнес эрхлэгчдээ дэмжихээр Баянзүрх дүүргийг Арилжааны дүүрэг болох зорилтыг дэвшүүлж Намъянжүгийн гудамжийг Бүтээлч гудамж болгон тохижуулахаар бэлтгэл ажил хангагдаад явж байгаа. Энэ гудамжны тохижилт дууссаны дараа ТҮЦ эрхлэгчдэд тодорхой байршлуудад зааж худалдаа арилжаа эрхлэх боломжоор хангана.

Эцэст нь энэ Улаанбаатар хот, Баянзүрх бол бидний хот, дүүрэг. Та бидний үр хүүхэд амьдрах, та бидний бүтээсэн, цаашид бүтээх хот, дүүрэг учраас нийтийн эрх ашгийг хангасан, эмх цэгцтэй, стандарттай, дүрэм журамтай байх ёстой юм шүү.

Иргэд та бүхнийг дэмжиж, ТҮЦ эрхлэгч та бүхнийг хамтарч ажиллахыг хүсье.

Posted by Нацагийн Баярмөнх on Thursday, September 7, 2023