Х.Хишигжаргал: Одоо бэлчээрийн даац 2,6 дахин ихэссэн. Энэ байдал цаашдаа үргэлжилбэл бид гарцгүй болно

“Уур амьсгалын өөрчлөгдөж байгаа нөхцөл байдалд, мал аж ахуй эрхлэх хандлагыг өөрчлөх зайлшгүй шаардлагатай. Дэлхийн дулаарлын улмаас хуурайшилт ихсэж, хур тунадас багасаж байна” гэж НҮБ-ын хөгжлийн хөтөлбөрийн уур амьсгалын өөрчлөлтийн асуудал хариуцсан шинжээч Х.Хишигжаргал хэллээ.

Тэрбээр үргэлжлүүлэн, “Одоо бэлчээрийн даац 2,6 дахин ихэссэн. Энэ байдал цаашдаа үргэлжилбэл бид гарцгүй болно. Уур амьсгалын өөрчлөлтөөс шалтгаалан байгалийн гамшигт үзэгдэл ихсэж байна.

Малчид зуд болон хүчтэй салхи шуурга, үерийн үзэгдэлд малаа алдаж, ихээхэн хохирол амсана. Хохирол амсахаас урьдчилан сэргийлж малчид, малчдын хоршоо хамтран ажиллаж хэрэгтэй.

Малын тоогоо бэлчээрийн даацад нийцүүлэн, маллах чадамжийн хүрээнд тоог нь зохицуулан ажиллах, дээрээс нь зах зээлд илүү чанартай бүтээгдэхүүн нийлүүлэх боломжийг төслийнхөн дэмжин ажиллана. Эхний байдлаар дөрвөн аймгийн найман суманд  хувийн хэвшилтэй хамтран ажиллана. Хоршоод нь зах зээлд чанартай бүтээгдэхүүн нийлүүлэн, уур амьсгалын өөрчлөлтөд дасан зохицох үйл ажиллагааг орон нутагтаа хэрэгжүүлэх хэрэгтэй” гэлээ.