Б.Даваамөнх: Эцэг малыг сайжруулах болон малыг хурга байхад нь махлуулах хэрэгтэй

Уур амьсгалын Ногоон сангийн санхүүжилтээр НҮБ-ын хөгжлийн хөтөлбөр, БОАЖЯ, ХХААХҮЯ хамтран хэрэгжүүлж буй “Монгол орны хөдөөгийн иргэдийн дасан зохицох чадамж болон эрсдэлийн менежментийг сайжруулах нь” /АДАПТ/ урт хугацааны төслийн танилцуулга өнөөдөр боллоо.

Бодлого судлалын төвийн бэлчээрийн менежментийн зөвлөх Б.Даваамөнх “Энэ төслийн хүрээнд Бодлого судлалын төвөөс төр, хувийн хэвшил, малчдын оролцоог бэхжүүлэх ажлыг хэрэгжүүлж эхлээд байна. Үүнд малчид бүлэг зохион байгуулалтад орж хамрагдана.

Ингэснээр малын тоог чанарт шилжих буюу 1000 малаас авах ашиг шимийг 500 малаас авдаг болох юм. Тиймээс малыг борлуулах ажил явагдана. Малчид ихэвчлэн наймаачийн гараар дамжин малаа борлуулдаг. Наймаачдын гар дамжилгүйгээр шууд үйлдвэр рүү нийлүүлдэг болгоно. Дараа нь малын гоц халдварт өвчний асуудал бий. Тухайн нутагт өвчин гарахаар нутгийн бүх мах, малын гаралтай бүтээгдэхүүн гаргахыг хориглодог.

Иймд малчдын хоёроос гурван хүнийг сонгон ажиллуулаад, эрүүл бүсийг тогтоох ёстой. Эрүүл бүсийг тогтоосноор эрүүл гэсэн бичгээ харуулаад малаа борлуулахад асуудалгүй болж байгаа юм.

Гуравт чанарыг нь сайжруулна. Эцэг малыг сайжруулах болон малыг хурга байхад нь махлуулах хэрэгтэй. Хургыг хавраас махлуулж эхлээд намар зарахад төлөг, шүдлэн малтай дүйцэх хэмжээний жинтэй болно гэсэн үг. Дөрөвдүгээрт малчдын бүлэгтээ мал борлуулсанд нь урамшуулал өгнө. Нэг хонь толгой тутамд 750 төгрөг, 10 үхэр зарлаа гэж бодоход 45 мянган төгрөгийн урамшуулал олгоно.

Ховд аймгийн Эрдэнэбүрэн, Дарви сум, Завхан аймгийн Шилүүстэй, Алдархаан сум, Дорнод аймгийн Чойбалсан, Баянтүмэн сум, Сүхбаатар аймгийн Халзан, Түвшинширээ гэх аймгийн суманд туршилтаар үйл ажиллагаагаа явуулж эхэлнэ. Үргэлжлэн дөрвөн аймгийн 68 суманд төслөө хэрэгжүүлнэ. Сумыг бэлчээрийн даац хэтэрсэн, малын тоо толгой хэт өссөн асуудлыг харгалзан үзэж сонгосон” гэсэн юм.