Эдинбургийн гүн, хунтайж Филипптэй салах ёс гүйцэтгэлээ

Их Британийн хатан хааны нөхөр, Эдинбургийн гүн, хунтайж Филиппийг эцсийн замд нь үдэх ёслол өчигдөр болж өндөрлөлөө. Тэрбээр дөрөвдүгээр сарын 9-ний өдөр 99 насандаа таалал төгссөн юм. 

Хунтайж Филиппийн шарилыг Виндзорын шилтгээн дэх Гэгээн Жоржийн сүм рүү авч явсан машины араас түүний дөрвөн хүүхэд болох хунтайж Чарльз, Эндрю, Эдвард, болон гүнж Анна, ууган ач нар болох хунтайж Уиллиам, Харри болон ордны өндөр хэргэм зэрэгтэй хүмүүс дагаж явжээ. 
 Ёслолын өмнөхөн хатан хаан мөн өөрийн машинаар жагсаалд оролцохоор шийдсэнээ мэдэгдсэн байна. Өмнө нь хатан хаан шууд сүмд очихоор төлөвлөж байв. Шарилыг нь сүмээс гарган Виндзорын шилтгээний танхим руу шилжүүлжээ. 
КОВИД-19-ийн нөхцөл байдлаас шалтгаалж зөвхөн уг ёслолд хааны гэр бүлийн 30 хүн л оролцсон байна. Халдварын тархалтаас сэргийлж олон нийтийг Виндзорын шилтгээний гадна цуглахгүй байхыг хүсчээ. Оршуулгын ёслолд бага насны ач гуч, зээ зээ зээнцрээс бусад гэр бүлийн бүх гишүүд оролцсон байна. 
Улс орон даяар 15:00 цагаас 1 минут дуугаа хурааж зогсон эмгэнэл илэрхийлсний дараа ёслолын үйл ажиллагааг эхлүүлжээ. 
Хунтайж Филиппийн өөрийнх нь зохион бүтээлцэж байсан Ланд Ровер автомашинаар шарилыг зөөвөрлөсөн байна. 
Тэрбээр хааны тэнгисийн цэргийн флоттой харилцаа холбоотой, далай тэнгист дуртай нэгэн байжээ. Тиймээс энэхүү арга хэмжээнд 730 гаруй цэргийн албан хаагч оролцсон байна. 
Букинхэмийн ордон хунтайж Филиппийг нас барсныг албан ёсоор зарласны дараа хааны ордон, засгийн газар болон цэргийн зарим байгууллагуудын бүх төрийн далбааг буулгажээ. 
 Харин хааны гэр бүлийн далбааг хэзээ ч буулгадаггүй аж. Учир нь хаан эсвэл хатан нас барах үед сэнтий залгамжлагч нь хаан (эсвэл хатан) болдог. Тиймээс тус улсад үргэлж хаан байдаг бөгөөд хаант засаглалын залгамж чанар хангагддаг байна.