Сүхбаатарын талбайд УБЗАА-тай хамтран ажиллах гэрээ байгуулсан “Ю Би Констракшн” компанийн гэрээг цуцалж авто зогсоолын үйл ажиллагааг зогсоох шийдвэр гаргасан. Улмаар Газар зохион байгуулалтын албанаас тус компанид газар чөлөөлөх тухай мэдэгдэх хуудсыг хүргүүлсэн.
Гурав хоногийн дотор газраа чөлөөлөөгүй тохиолдолд хуулийн дагуу албадан чөлөөлөх арга хэмжээ авах ёстой. Газраа чөлөөлөөгүй тул өнөөдөр холбогдох албаныхан албадан буулгах ажиллагаа явагдлаа.
Энэ талаар Нийслэлийн мэргэжлийн хяналтын газрын дэд дарга С.Даваасүрэн хэлэхдээ, “Газар эзэмших эрхийг захирамжаар хүчингүй болгосон учир тус газарт явагдаж байгаа үйл ажиллагаануудыг зогсоох ёстой. Прокурорын байгууллагад мэдэгдсэнийхээ дагуу, зогсож буй машинуудыг гаргаж, нэвтрэх хэсгүүдийн хашилтуудыг лацдах гээд зогсож байна. Үүний дараа хотын удирдлагууд энэ газарт дараагийн үйл ажиллагаануудаа явуулах байх” гэлээ.
Мөн НЗДТГ-аас “Өнгөрсөн хоёр жилийн хугацаанд талбайн газрыг ашиглахдаа улсад нэг ч удаагийн төлбөр төлж байгаагүй. Улаанбаатар хотын захирагчийн алба албан бичиг явуулдаг ч тодорхой хариу ирүүлдээгүй байсан. Орлогын 30 хувийг “Нийслэийн замын сан”-д төвлөрүүлэх ёстой ч, одоогийн байдлаар нэг ч төгрөг төлөөгүй учир бид шүүхэд хандах хуулийн үндэслэлтэй” гэв.
+ There are no comments
Add yours