1984 онд төрсөн одоо 35 настай эрэгтэй Э нь Эрүүгийн хуулийн тусгай ангийн 145.2, 146.2, 147.2, 216.2-р зүйл ангиудад зааснаар нийтдээ дөрвөн удаагийн ял шийтгэл эдэлж байсан нэгэн. Зүйл ангиудыг нь тодруулбаас, хулгайлах, дээрэмдэх, булаалт зэрэг Эрүүгийн төрлийн гэмт хэргүүдийг үйлдэж байсан аж. Мөн дээрх хэргүүдийг удаа дараа үйлдсэн хэргээр ял эдэлж байсан байх юм.
Түүний ээж аав нь өдгөө 80 насыг шүргэж яваа азай буурлууд байдаг. Хүүгээ олон удаагийн гэмт хэрэг үйлдэж байхыг нь хараад зэмлээд ч нэмэргүйд халаглан суугаа. Буурлуудын хүү нь гэмт хэрэг үйлдэхдээ улам гаршиж цаашлаад өөрийн төрсөн ээж аавын өв уламжлагдан ирсэн үнэт эдлэлүүдийг танил найзууддаа хэлж, захиалан дээрэмдүүлжээ.
Тодруулбал, Хоёрдугаар сарын 7-ны өдөр буюу Сар шинийн баярын шинийн гуравны өдөр Чингэлтэй дүүргийн 16-р хорооны нутагт байрлах “Согоот тоотод суух ээж болох 80 настай Н, аав болох 79 настай Д нарынх нь гэрт үл таних хоёр этгээд оройн 23:05 цагт дайран орж дээрэмдсэн хэрэг гарсан. Гэр лүү нь дайран орсон хоёр этгээд дунд гарын халтар манан хөөрөг, алтан гинж, 170.000 төгрөг, загвар тодорхойгүй хоёр ширхэг гар утсыг авч, хэргийн газраас зугтаажээ.
Үл таних өндөрдүү нуруутай, бараан хувцастай хоёр залуу гэрлийг нь унтраан, нүүр лүү нь гар чийдэн тусган айлган сүрдүүлж дээрмийн хэргээ үйлдсэн байдаг. Гэрийн эзэд тэр өдөр хоёулахнаа унтахаар хэвтэж байхад нь гаднаас хаалгыг нь эвдэн орсон талаар цагдаагийнханд хэлсэн аж. Тэдний өгсөн дуудлагын дагуу цагдаагийнхан мөрдөн шалгах ажиллагаа явуулснаар нэг этгээдийг шуурхай илрүүлсэн аж. Харин нөгөө нь Дархан-Уул аймаг руу оргон зайлсан байж болзошгүй байгаа юм байна.
Дээрэм үйлдэн зугтаж явахдаа баригдсан этгээд гэмт хэрэг хийх болсон шалтгаанаа гэрийн эздийн хүү нь ээж, аавынд нь үе дамжин ирсэн үнэтэй хөөрөг, өндөр үнэд хүрэх алтан гинж байгаа хэмээн хадгалдаг байршилыг нь зааж өгч явуулсан талаараа хэлсэн байна. Мөн дээрэмдэж авсан эд зүйлсээ хувааж авах болзолтойгоор гэр лүүгээ явуулсан хэмээжээ.
Уг хэргийг гэрийн эздийн төрсөн хүү нь захилан үйлдүүлсэн нь тогтоогдсон бөгөөд өөрөө ч хүлээн зөвшөөрсөн тайлбарыг өгсөн байгаа юм. Одоогоор өөрийн гэр лүүгээ дээрэм хийлгэхээр явуулсан этгээдийг шалгаж байгаа гэх ба оргон зайлсан этгээдийг эрэн хайж байгаа аж.
Тэднийг санаатайгаар бүлэглэн дээрмийн хэрэг үйлдсэн хэргээр Эрүүгийн хэрэг үүсгэн шалгаж эхэлсэн байна. Харин захиалсан этгээдэд гэмт хэрэг захиалсан, зохион байгуулсан хэрэгт холбогдуулан шалгах юм.
+ There are no comments
Add yours