Өнгөрсөн онд ял шийтгүүлсэн эмэгтэйчүүдийн тоо 47 хувиар өсжээ

Шүүхийн Ерөнхий зөвлөлөөс өнгөрсөн 2018 оны шүүн таслах ажиллагааны жилийн тоймыг өнөөдөр танилцуулсан ба энэ үеэр өнгөрсөн онд гарсан эрүүгийн хэргийн талаарх тоо баримтыг мөн дэлгэлээ.

Өнгөрөгч 2018 онд Монгол Улсын анхан шатны шүүхүүд нийт:

Эрүүгийн 12,551 хэрэг,
Иргэний 48,155 хэрэг,
Захиргааны 1,638 хэрэг буюу нийт 62,344 хэрэг, маргааныг хянан шийдвэрлэж,
12,904 зөрчлийн хэрэгт шийтгэл оногдуулж,
1,087 хүнийг хорих ял эдлэхээс хугацааны өмнө суллаж,
3,747 хүнд цагдан хорих таслан сэргийлэх арга хэмжээ тус тус авсан талаар ШЕЗ мэдээлэв.

Анхан шатны шүүхээр хянан шийдвэрлэсэн Эрүүгийн хэрэг өмнөх оны мөн үеэс 42 хувиар, Иргэний хэрэг 6.5 хувиар тус тус өсөж, Захиргааны хэрэг 14.1 хувиар буурсан байна.

Анхан шатны шүүхээр хянан шийдвэрлэсэн нийт хэргээс дараах төрлийн гэмт хэрэг өсссөн байна. Үүнд:

Хүчиндэх гэмт хэрэг 91 хэргээр буюу 47.6 хувиар,
Дээрэмдэх гэмт хэрэг 116 хэргээр буюу 62.7 хувиар,
Хүний эрүүл мэндэд хүнд хохирол учруулах гэмт хэрэг 11 хэргээр буюу 3.2 хувиар,
Хулгайлах гэмт хэрэг 137 хэргээр буюу 9.7 хувиар,
Авто тээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг 290 буюу 39.7 хувиар,
Залилах гэмт хэрэг 180 хэргээр буюу 65.8 хувиар,
Мансууруулах эм, сэтгэцэд нөлөөт бодисыг хууль бусаар ашиглах гэмт хэрэг 43 хэргээр буюу 50.6 хувиар тус тус өссөн байна.

Харин хүнийг алах гэмт хэрэг 18 хэргээр буюу 9.2 хувиар, улсын хилээр барааг хууль бусаар нэвтрүүлэх гэмт хэрэг 1 хэргээр буюу 1.18 хэргээр тус тус буурсан үзүүлэлттэй байгаа аж.

2018 ОНД ЯЛ ШИЙТГҮҮЛСЭН ЭМЭГТЭЙЧҮҮДИЙН ТОО ӨССӨН БАЙНА

Монгол Улсын анхан шатны шүүхээс нийт 12,366 хүн, хоёр хуулийн этгээдэд ял шийтгэл оногдуулсан ба энэ нь өмнөх оны мөн үеэс 37.1 хувиар өссөн үзүүлэлт юм.

Ял шийтгүүлсэн нийт 12,366 хүнийг зарим бүлгээр авч үзвэл ял шийтгүүлсэн эмэгтэйчүүдийн тоо өмнөх оноос 442 хүн буюу 47.4 хувиар өссөн байна.

Урьд ял шийтгүүлсэн хүний тоо 637 буюу 32.2 хувиар өссөн бол өсвөр насны хүний тоо 123 хүнээр буюу 28.9 хувиар, гэмт хэрэг бүлэглэж үйлдсэн хүн 530 хүнээр буюу 30.6 хувиар тус тус буурсан байна.

Ял шийтгүүлэгчдийн дотор 18-29 насны ял шийтгүүлэгчид 5,099 байгаа нь нийт ял шийтгүүлэгчдийн 41.3 хувийг эзэлж байна.

Гэмт хэргийн улмаас учирсан хохирлын хувьд Монгол Улсын хэмжээнд 14,053 хүн хохирч, 230 төрийн болон хувийн хэвшлийн байгууллага, 40.7 тэрбум төгрөгний эд хөрөнгийн хохирол учруулсан бол 533 хүний амь нас гэмт хэргийн улмаас хохирч, 8,224 хүний биед хөнгөн болон хүнд хэлбэрийн гэмтэл учруулсан талаар тус тус танилцуулав.