Мал, амьтны эрүүл мэндийн тухай хуулийн төслүүдийг эцэслэн баталлаа

Өнөөдөр /2023.12.08/ Улсын Их Хурлын чуулганы нэгдсэн хуралдаанаар Мал, амьтны эрүүл мэндийн тухай хуульд нэмэлт, өөрчлөлт оруулах тухай, Амьтан ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг эцэслэн баталлаа.

Хамтран ажилласан ажлын хэсгийнхэндээ баярлалаа.

Мал амьтны эрүүл мэндийн тухай хуулийг 2017 онд баталж мал, амьтны эрүүл мэндийг хамгаалах, мал, амьтны гаралтай түүхий эд, бүтээгдэхүүний ариун цэвэр, эрүүл ахуйн шаардлагыг хангах улмаар нийтийн эрүүл мэндийг хамгаалах зорилтыг хэрэгжүүлэх, улмаар мал, амьтны эрүүл мэндийг хамгаалах тогтолцоог шинэчилж, мал, амьтны эрүүл мэндийн байгууллагын үйл ажиллагааг олон улсын жишигт нийцүүлэн явуулах боломжийг, эрх зүйн орчныг бүрдүүлсэн.

Тэгвэл өнөөдөр Мал, амьтны эрүүл мэндийн тухай хууль болон холбогдох бусад хуульд нэмэлт, өөрчлөлт оруулан мал, амьтны эрүүл мэндийг хамгаалах, экспортыг дэмжих, малын махыг олон улсын мал, эмнэлэг, ариун цэврийн шаардлагыг хангаж, экспортод гаргах, амьтан ургамал, түүхий эд, бүтээгдэхүүний эрүүл мэнд, хорио цээрийн нөхцөл, ургамлын хорио цээрийн гэрчилгээ, олон улсын мал эмнэлэгийн гэрчилгээг олгох үйл ажиллагааг хөдөө аж ахуйн асуудал эрхэлсэн төрийн захиргааны төв байгууллага болон мал, амьтны эрүүл мэндийн асуудал хариуцсан төрийн захиргааны байгууллага хэрэгжүүлэх боломжийг тусгасан шийдвэр гаргалаа.