“Коин гаргасан Х.Эрдэнэбаяр сураггүй алга болсон. Компанийн эцсийн өмчлөгч нь Хакүхо М.Даваажаргал бидний сайн мэдэх хүн байсан учраас итгэсэн”

“Ворлд Плас Дижитал” компанийн гаргасан WPL коиныг авч хохирсон иргэн С.Бат-Очир өнөөдөр “Үндэсний мэдээллийн төв”-д мэдээлэл хийлээ.

Тэрбээр “2021 онд “IHC” коин гарсны дараа манай улсад энэ коин гэх зүйл борооны дараах мөөг шиг болсон. Үүнтэй зэрэгцэн “Ворлд Плас Дижитал” компаниас WPL коиныг тус оны 11, 12 дугаар сард гаргаж, арав орчим тэрбум төгрөгийг татан төвлөрүүлсэн.

Тус компанийн эцсийн өмчлөгч нь Хакүхо М.Даваажаргал, Мотохарү Кимүра гэх Япон улсын иргэн мөн Х.Эрдэнэбаяр гэсэн хүмүүс байдаг. Гэхдээ WPL нь бусад коиноос маш их ялгаатай. Тухайлбал, компанийн зүгээс коин гаргасныхаа дараа мэдэгдэл гаргаж, коиноо буцаагаад худалдаж авна гэсэн.

Ингэхдээ жилийн 24 хувийн өгөөж амласан юм. Энэхүү мэдэгдлээ 2022 оны нэгдүгээр сард гаргаж, хоёр болон гуравдугаар сараас эхлэн тогтсон дүнгээр, үе шаттайгаар худалдаж авна гэдэг зүйл ярьсан юм. Ингээд тухайн оны гуравдугаар сарын 9-ний өдөр коиноо буцаагаад зарах гэтэл шалтаг хэлээд худалдаж аваагүй. Удаа дараа ийм асуудал гаргасан учраас коин худалдаж авсан иргэдийн төлөөлөл компанийн захиралтай нь очиж уулзсан. 

Тухайн үед компанийн захирал нь бидэнд хандаж “Нөхцөл, шалтаг тавихгүйгээр та нарт байгаа бүх коиныг худалдаж авна” гэж хэлсэн юм. Гэтэл долдугаар сар болоод коиноо худалдаж авах нь битгий хэл захирал Х.Эрдэнэбаяр нь өөрөө алга болчихсон. Компанийн ажилтнууд нь АНУ руу явж хөрөнгө оруулалт хөөцөлдөж байгаа гэж ярьдаг. Хэлсэн үгэнд нь дахиад итгэсэн. 

Түүнчлэн Хакүхо М.Даваажаргал, Мотохарү Кимүра гэх Япон улсын иргэн өөрсдийгөө компанийн эзэмшлээс хассан байна. Бидний сайн мэдэх хүн монголчуудыгаа хуурахгүй байх гэж итгэсэн. Олон хүн нэр төртэй энэхүү хоёр эрхэмд итгэж коин авсан.

Энэ коины үнэ 50 дахин унасан. Тухайн үед энэ коинд итгэж 1 сая төгрөгөөр худалдан авалт хийсэн хүн 20 мянган төгрөгтэй болсон гэсэн үг. Мөнгөө босгочхоод өөрсдөө алга болдог ёсзүйгүй байж болохгүй. Бид хохирсон мөнгөө олж авахын тулд эцсээ хүртэл явна. Бажи, Ялалт зэрэг олны танил хүмүүс ч энэ коиныг сурталчилж байсан” гэлээ.