“Хог хаягдлын үйлчилгээний хураамж”-ийг шинэчилэн тогтоох тогтоолын төсөлд санал авч байна

Хог хаягдлын хураамжийн одоогийн мөрдөж байгаа тариф нь 2013 онд баталсан хэмжээ бөгөөд энэ нь хог хаягдлын хураамжаар нөхөх зардал буюу хог хаягдлыг цуглуулж, тээвэрлэх зардал, хог хаягдлыг булшлах бодит зардлыг нөхөж чадахгүйгээс хог тээврийн байгууллагууд хог тээврийн автомашинуудыг шинэчлэх, хүрээмжтэй ажиллах боломжгүйд хүрч улмаар иргэдийн эрүүл, аюулгүй, цэвэр орчинд амьдрах эрх зөрчигдөх эрсдэлд хүргэж байна. Мөн айл өрхийн гишүүдийн тооноос хамаарч өрхөөс гарах хог хаягдлын хэмжээ харилцан адилгүй байгаа нь хог хаягдлын хураамжийг өрхөөр тооцож авах аргачлал нь тохиромжгүй гэдгийг харуулж байна.

Хог хаягдлын тухай хуульд зааснаар дүүргийн иргэдийн Төлөөлөгчдийн Хурал нь тухайн нутаг дэвсгэрт мөрдөх хог хаягдлын хураамжийн хэмжээг тогтоох, энгийн хог хаягдлыг цуглуулж, тээвэрлэх тарифыг батлах эрх зүйн зохицуулалттай.

Өнөөдрийг хүртэл хог хаягдлын хураамжийг 9 жилийн өмнө тогтоосон үнэлгээгээр авч байгаа бөгөөд инфляцтай уялдуулж үнэ тарифыг шинэчлэн тогтоох шаардлага гарч байна.

Тогтоолын төсөлд сард авах хог хаягдлын хураамжийг иргэнээс, аж ахуйн нэгжээс тус тусдаа тарифтай байхаар шинэчлэн тогтоохоор санал авч байна. Энэ нь хог тээврийн байгууллагууд бодит зардлаараа санхүүжих, зориулалтын техник хэрэгслээр парк шинэчлэлт хийх, хог хаягдлын менежментийг сайжруулах боломжийг бүрдүүлэх юм.

Захиргааны ерөнхий хуулийн 62 дугаар зүйлийн 62.1 дэх хэсэг, 62.4.3 дахь заалтад заасны дагуу “Хан-Уул дүүргийн нутаг дэвсгэрт иргэн болон аж ахуй нэгжээс авах хог хаягдлын үйлчилгээний хураамжийн хэмжээг шинэчлэн батлах тухай” дүүргийн иргэдийн Төлөөлөгчдийн Хурлын тогтоолын төслийг олон нийтээс санал авч, хэлэлцүүлэхээр https://khanuul.mn/tusold-sanal-avah/ цахим хуудаст байршуулж байна. Мөн тогтоолын төсөлд саналаа ……………………….. цахим хаягаар ирүүлэх боломжтой.