Москвад онгоц осолдож, 41 хүн амь эрсдэлээ

Уг онгоц Москвагаас Мурманскийг чиглэн хөөрсөн ч эвдрэл гарсан тул буцаж ослын буулт хийх гэж байгаад осолдсон аж. Одоогоор ослын шалтгааныг тогтоохоор ажиллаж байгаа бөгөөд онгоцны ахмадын хэлснээр, “Онгоц хөөрснийхөө дараа аянганд цохиулж, улмаар радиолокацийн систем нь эвдэрч газраас холбоо тасарсан” гэжээ. Энэ үеэр автомат жолоодлогын систем нь ажиллагаагүй болсон тул ослын буулт хийсэн аж.

“Sukhoi Superjet 100” онгоц буухдаа маш хүчтэй газардсанаас болж уг онгоцны хөдөлгүүр шатаж эхэлжээ. Энэхүү СУ 1492 чиглэлийн онгоцонд нийт 73 зорчигч болон нисэх багийн таван гишүүн явснаас 41 хүн амь үрэгдсэн харамсалтай явдал болсон байна.

Албаныхны мэдээлснээр, амиа алдагсдын дотор хоёр хүүхэд байсан бол амьд үлдсэн хүмүүсээс гурвынх нь биеийн байдал маш тааруу байгаа гэжээ.