УИХ-ын гишүүнийг эгүүлэн татах хуулийн төсөл: Хэн, юу хэлэв?

Монгол Улсын Ерөнхийлөгчөөс өргөн мэдүүлсэн “УИХ-ын тухай хууль”-д нэмэлт, өөрчлөлт оруулах буюу “УИХ-ын гишүүнийг эгүүлэн татах” тухай хуулийн төсөл олны анхаарлын төвд байна. Уг хуулийн төслийн хэлэлцэх эсэх асуудал өнгөрсөн долоо хоногийн УИХ-ын чуулганаар ирц хангалтгүйн улмаас ирэх пүрэв гараг хүртэл хойшлогдоод байгаа юм.

Хуулийн төсөлд тусгагдсан онцлох заалтууд

Хуулийн төсөлд гишүүний бүрэн эрхийг хугацаанаас нь өмнө дуусгавар болгох дараах үндэслэлүүдийг шинээр нэмж, өөрчлөхөөр тусгажээ:

• Намын жагсаалтаар сонгогдсон гишүүд: Ёс зүйн ноцтой зөрчил гаргасан гэж үзвэл нэр дэвшүүлсэн нам, эвслийн төлөөллийн төв байгууллага нь эгүүлэн татах саналаа УИХ-ын даргад өргөн мэдүүлнэ.
• Хурал таслалт: Ээлжит чуулганы хуралдаан болон санал хураалтын 30-аас дээш хувьд биечлэн оролцоогүй буюу тасалсан.
• Ёс зүйн хариуцлага: Өргөсөн тангаргаасаа няцсан, ёс зүйн дүрмийг ноцтой болон удаа дараа зөрчсөн.
• Цэцийн дүгнэлт: Үндсэн хуулийн цэцээс “Үндсэн хууль зөрчсөн” гэсэн дүгнэлт гаргасан.

Төслийг дэмжиж буй гишүүдийн байр суурь

Өнгөрсөн нэг сар хагасын хугацаанд С.Бямбацогт, Б.Пүрэвдорж, Н.Наранбаатар, Б.Энхбаяр, Л.Энх-Амгалан нарын 30 гаруй гишүүн төслийг хэлэлцэхийг дэмжихээ илэрхийлсэн юм.

• Б.Пүрэвдорж: “Ерөнхийлөгчийн хуулийг эсэргүүцээд байгаа хүмүүс ‘Би цаашид хариуцлагагүй байна, хулгай хийнэ’ гэж бодоод байгаа юм уу? Хэлэлцүүлгийн шатанд парламентын дархлаагаа яриад явах нь зөв.”
• Н.Наранбаатар: “УИХ-ын гишүүдийн нэр хүнд маш их унасан байна. Орон нутагт очиход иргэд биднийг яаж хүлээж авч байгааг бодох хэрэгтэй.”
• Э.Бат-Амгалан: “100 байтугай 200 хувь дэмжиж байна. Сургуулийн хүүхэд хичээл таслахад арга хэмжээ авдаг биз дээ. Дээрээсээ үлгэр дуурайлал үзүүлж байж улс орон хөгжинө.”
• Э.Батшугар: “Компанийн ажилтан ёс зүйн алдаа гаргавал халагддаг. Гишүүд бүрэн эрхийн бамбай дор хариуцлагаас зугтах нь шударга бус.”
• Ц.Сандаг-Очир: “Иргэд энэ хуулийг нийтээрээ дэмжиж байна. Үүнийг дархлаанд халдлаа гэж харахаас илүү засаж залруулах боломж гэж харах хэрэгтэй.”

Төслийг дэмжихгүй байгаа гишүүд

Нөгөө талд уг хуулийн төслийг парламентын засаглалыг сулруулах, улс төрийн шахалт үзүүлэх эрсдэлтэй хэмээн үзэж буй гишүүд цөөнгүй байна. Үүнд:

Л.Оюун-Эрдэнэ, Н.Алтанхуяг, Х.Тэмүүжин, О.Цогтгэрэл, Ч.Лодойсамбуу, Х.Баттулга, Н.Номтойбаяр, С.Ганбаатар, М.Нарантуяа-Нара нарын гишүүд одоогоор дэмжихгүй гэсэн байр суурьтай байна.