БГД-ийн төлөөлөгч эмэгтэй гэр бүлийн маргаанаас болж нөхрөө хутгалжээ

Баянгол дүүргийн ИТХ-ын төлөөлөгчөөр ажилладаг Б овогтой У нь гэр бүлийн маргааны улмаас бусдын биед халдсан байж болзошгүй хэрэгт холбогдон, тус дүүргийн хууль хяналтын байгууллагад шалгагдаж байна.

Тодруулбал, 2026 оны 3 дугаар сарын 21-ний шөнийн 01 цагийн орчимд Баянгол дүүргийн нутаг дэвсгэрт байрлах өөрийн эзэмшлийн үйлчилгээний газарт иргэн Б.У нь гэр бүлийн хүн болох иргэн М-тэй маргалдаж, улмаар мэсний зүйл ашиглан биед нь хөнгөн гэмтэл учруулсан тухай дуудлага мэдээллийг хэргийн гэрчүүд цагдаагийн байгууллагад өгчээ.

Түүнчлэн уг хэргийг нуун дарагдуулах зорилгоор хохирогч болон холбогдогч этгээдүүд бусдыг дарамталсан, өр авлагын асуудалтай холбон төөрөгдүүлсэн байж болзошгүй нөхцөл байдал илэрсэн гэх мэдээлэл байна. Тодруулбал, биед үүссэн гэмтлийг бусдын захиалгаар хийгдсэн мэтээр харуулж, нэр бүхий иргэдийг сүрдүүлсэн байж болзошгүй асуудлыг хуулийн байгууллага нягталж байгаа аж.