Нийслэлийн иргэдийн төлөөлөгчдийн хурлын төлөөлөгч Г.Батсайхан, Л.Хосбаяр, Б.Мягмар Нийслэлийн Засаг даргын Нийгмийн салбар, ногоон хөгжил, агаар, орчны бохирдлын асуудал хариуцсан орлогч А.Амартүвшин, нийслэлийн Ерөнхий архитектор Ч.Төгсдэлгэр нар танилцуулга хийж, Хан-Уул дүүрэг ирээдүйд ямар чиглэлээр хөгжих, яаж хот болж тэлэх зэрэг асуудлаар иргэдэд мэдээлэл өглөө. Түүнчлэн Хан-Уул дүүргийн Засаг дарга Б.Цэрэн болон тус дүүргийн удирдах албан тушаалтнууд оролцлоо.
Тухайлбал Хан-Уул дүүрэгт түгжрэлийг шийдэх хүрээнд томоохон дэд бүтцийн төслүүд хийгдэх байна. Ирээдүйн хорин жилд бүтээн байгуулах дэд бүтэц, мега төслүүд, бүтээн байгуулалтын шийдлүүдийг иргэд дэмжиж санал, бодлоо хуваалцлаа. Улаанбаатар хотод тулгамдаж буй асуудлыг шийдвэрлэх зорилгоор 2040 он хүртэл 24 томоохон төсөл, хөтөлбөрүүдийг хэрэгжүүлнэ. Ингэснээр иргэнд ээлтэй, төрийн үйлчилгээ ойртсон, эко хот болох юм.
