ПРОКУРОР: Үндэслэлгүйгээр торгуулсан иргэдийн 196.8 сая төгрөгийг буцааж олгоно

2023 онд Нийслэлийн Прокурорын Газраас зөрчлийн хэрэг бүртгэлт явуулах эрх бүхий 84 байгууллагын албан тушаалтан зөрчлийн тухай хууль тогтоомжийг зөрчиж шийтгэл оногдуулсан 113 шийдвэрт дүгнэлт бичиж дүүргийн эрүүгийн хэргийн анхан шатны болон Нийслэл дэх захиргааны хэргийн анхан шатны шүүхэд хүргүүлэн, 88 шийдвэрийг зөвтгүүлжээ.

Ингэснээр 52 хүн, долоон хуулийн этгээдэд үндэслэлгүйгээр оногдуулсан 90.4 сая төгрөгийн торгуулийн мөнгийг прокурорын дүгнэлтээр буцаан олгуулахаар болсон байна.

Харин 2024 оны тавдугаар сарын байдлаар таван шийдвэрийг зөвтгүүлж, дөрвөн хүн, гурван хуулийн этгээдэд 106.4 сая төгрөгийн торгох шийтгэл оногдуулсан долоон шийдвэрийг хүчингүй болгуулжээ.

Нийслэлийн Прокурорын Газраас энэ оны зургаан сард шүүхийн шийдвэрийн биелэлттэй танилцаж, торгуулсан иргэдийн мөнгийг буцаасан эсэхийг шалгахад, эрх нь зөрчигдсөн иргэн, хуулийн этгээдэд Төрийн сангийн данснаас буцаалтыг бүрэн шилжүүлж дуусаагүй нөхцөл байдал тогтоогджээ.

Тиймээс зөрчлийн хэрэг бүртгэх ажиллагаа явуулах эрх бүхий 12 байгууллагад шүүхийн шийдвэрийн биелэлтийг хангаж, иргэдийн мөнгийг буцаан олгох ажиллагааг эрчимжүүлж ажиллах талаар албан бичиг хүргүүлж, биелэлтийг эргэж тооцохоор болсныг мэдээллээ.