Б.Батбаатар: Сурагчдын тоо бага гэх шалтгаанаар сургуулийн 30 эмчийг ажлаас нь халжээ

“Боловсролын салбар дахь эмч нарын Эрүүл Ирээдүй” холбооноос орон нутгийн сургуулийн эмч нарыг олноор ажлаас халж байгаа талаар өнөөдөр “Үндэсний Мэдээллийн Төв”-д сэтгүүлчдэд мэдээлэл хийлээ.

Энэ талаар тус холбооны тэргүүн Б.Батбаатар “Боловсрол, Шинжлэх Ухааны Яам (БШУЯ)-ны сайд болон Сангийн сайд нар хамтарч 2018 онд гаргасан А02411 тоот тушаалыг үндэслэн орон нутгийн сургуулийн эмч нарыг олноор нь халж байгаа талаар мэдээлэл хүргэе.

Дээр дурдсан 2018 оны тушаалаар сургууль, цэцэрлэгт эмч байх журмыг баталсан. Тодруулбал 481-ээс доош сурагчтай сургуульд эмчийн орон тоо шаардлагагүй гэж үзсэн. Энэ тушаалыг үндэслэж одоогийн байдлаар 30 гаруй эмч ажлаасаа халагдлаа.

Энэ бол зөвхөн эмч ажлаасаа халагдаж байгаа төдий асуудал биш. Үүний цаана хүүхдийн эрхийн асуудал яригдана. Заасан тооноос бага хүүхэдтэй сургууль, цэцэрлэгийн хүүхдүүдийг орон нутгийн эрүүл мэндийн төв хариуцна гэж үгүй.

Сурагчдын тооноос хамаарч сургууль, цэцэрлэгийг эмчгүй болгоно гэдэг нь олон талаар сөрөг үр дагавартай асуудал. Тиймээс БШУЯ руу олон удаа шаардлага хүргүүлсэн боловч “төсөв хэмнэж” байна гэхээс өөр хариу хэлдэггүй.

Хэдхэн эмч нарыг ажлын байрнаас нь цомхотгосноороо төсөв хэмнэхгүй. Боловсролын салбарт ажиллаж буй эмч нарын хөдөлмөрийг үнэлэхгүй байна. Урамшуулал, ур чадварын мөнгө өгдөггүй, үр дүнгийн нэмэгдэл олгодоггүй, орон нутгийн нэмэгдэл байдаггүй.

Эмч нарын ажлын байрны нөхцөл муу. Зарим сургуульд даралтын аппаратгүй, тэд бор зүрхээрээ явдаг улс. Ажиллах орчин тааруу байдаг тул Нийслэлийн хэмжээнд боловсролын салбарын 10 гаруй хувь нь эмчгүй болсон. Одоо ажиллаж буй эмч нарын ихэнх нь тэтгэврийн насныхан байдаг. Залуу эмч нарыг ажиллуулах гэхээр цалин бага, ажлын нөхцөл нь хүнд тул тогтвортой байдаггүй.

Түүнчлэн эм тариа ороож боох материалаар эмч нарыг хангах ёстой. Гэтэл төсөвт огт тусгагдаагүй тул сургуульд ийм материал байдаггүй. Үүнээс шалтгаалан анхан шатны тусламж хүүхдүүдэд үзүүлэхэд хүндрэл гардаг. Энэ талаар холбогдох хүмүүст нь шаардлага тавьсан боловч асуудлыг шийдэж өгөөгүй” гэж ярилаа.