Д.Тогтохсүрэн: Нэр дэвшигчид урлаг, спортын арга хэмжээ, тэмцээн уралдаан зохион байгуулахыг Сонгуулийн хуулиар хориглосон

УИХ дахь МАН-ын бүлгийн хурлаар гурван асуудлыг хэлэлцсэн байна. Нэгдүгээрт, намрын чуулганыг ирэх долоо хоногт завсарлуулахтай холбоотойгоор чуулганаар хэлэлцэж батласан хуулиудын талаар хоёрдугаарт, Банкны тухай хууль түүнийг дагаж мөрдөх журмын тухай хуулийн талаар гуравдугаарт, Сонгуулийн хууль тогтоомжийг хэрэгжүүлэх чиглэлээр анхаарах асуудлаар гишүүддээ мэдээлэл өгчээ. 

Энэ талаар тус бүлгийн дарга Д.Тогтохсүрэн ” Намрын чуулганыг нэгдүгээр сарын 20-ны үед завсарлуулна. Завсарлахаас өмнө хэд, хэдэн хуулийн төслийг батлах шаардлагатай байна. Тухайлбал, Эрүүгийн хэрэг хянан шийдвэрлэх тухай хууль, Иргэний хэрэг хянан шийдвэрлэх тухай хуульд оруулах нэмэлт өөрчлөлт, Хүүхэд хамгааллын тухай хууль, Үнэт цаасны тухай хууль, Эмэгтэйчүүдийн бизнесийг дэмжих чиглэлийн хуулиудыг намрын чуулганаар батлах шаардлагатай байна. Мөн энэ сарын 01-ны өдрөөс Сонгуулийн хууль хэрэгжиж эхлээд байна. Уг хуулиар олон үйлдлийг хориглосон. УИХ-ын гишүүд тойрогтоо ажиллахдаа хууль зөрчихгүй байхад анхаарах тал дээр гишүүдэд мэдээлэл өгсөн. УИХ-ын гишүүд зөвхөн хурал хийж, тайлан тавина. Урлаг соёл, спорт зэрэг бусад арга хэмжээг зохион байгуулах нь Сонгуулийн хуулиар хориотой. Олон дагагчтай хүнийг бүртгэхгүй, сурталчилгаанд ашиглах эсэхээ нэр дэвшигч өөрөө шийднэ” гэлээ. 

Харин Банкны тухай хуулийг дагаж мөрдөх журмын тухай хуулийн төслийн талаар УИХ-ын гишүүн О.Баттөмөр ” Банкны тухай хуульд банкны нэг хувьцаа эзэмшигчийн хувьцааны хэмжээ 20 хувиас хэтрэхгүй байна гэдэг заалт орсон. Энэ хууль 2024 оны нэгдүгээр сарын 01-ны өдрөөс хэрэгжиж эхэлсэн. Үүнтэй холбогдуулан Олон улсын байгууллага болон манай банкиудаас тус хуулийн хэрэгжих хугацааг хойшлуулж өгөх саналыг тавьж байгаа. Энэ саналыг хэлэлцээд 2026 он хүртэл сунгасан” гэлээ.