Хотын дарга асан Д.Сумъяабазарыг гэрчээр дуудсан ч ирээгүй байна

Нотлох баримтыг шинжлэн судлах эхний сэдэв: “Эрдэнэс Тавантолгой” ХК-д Таван толгой ордын Бортээгийн уурхайд хөрс хуулалт, нүүрс олборлолт, өрөмдлөг, тэсэлгээ, нүүрс баяжуулах үйлчилгээ үзүүлэгчийг сонгон шалгаруулах /Эрдэнэс тавантолгой майнинг ХХК/. Нийт 17 гэрчийг дууджээ. Улаанбаатар хотын Засаг дарга асан Д.Сумъяабазарыг гэрчээр дуудсан ч ирээгүй байна.

Шинжээчийн дүгнэлт:

-“Эрдэнэс таван толгой” ХК-ийн 2021 оны худалдан авах төлөвлөгөөнд тус төсөлд 715 тэрбум төгрөгийн төсөвт өртөг баталжээ. Худалдан авах ажиллагааны сонгон шалгаруулалтыг цахим хэлбэрээр 3 удаа нээлттэй зохион байгуулсан байна.

Эхний тендер шалгаруулалт 2021.03.19-ны өдөр зарласан. Гэтэл дөрөвдүгээр сарын 16-нд эрх бүхий байгууллагаас тендер зарлахыг болиулсан тул цуцалж байна гэсэн зар оруулжээ. Үнэлгээний хорооны нарийн бичгийн дарга О.Бат-Амгалан “Компанийн мөнгө, санхүүтэй холбоотойгоор гүйцэтгэх захирал болон эрх бүхий байгууллагаас тендерийг буцаан татуулсан” гэж хурлын үеэр тайлбарласан байна. Тендер шалгаруулалтыг зогсоох үндэслэл бүхий шалтгаан тогтоогдоогүй.

Хоёр дахь тендер шалгаруулалт 2021.08.09 эхэлсэн. Хоёр компани тендерт оролцсон ч Үнэлгээний хороо хуралдаад хоёр тендерийг шаардлага хангахгүй гэж үзсэн.

Гурав дахь тендер 2021.09.15-ны өдрийн тушаалаар Үнэлгээний хороог шинэчлэн байгуулсан. Шинэ үнэлгээний хороонд Х.Батсайхан Захиргаа, удирдлагын газрын дарга зэрэг дөрвөн хүн шинээр орж ирсэн. Өөрчлөгдсөн үнэлгээний хороо тендерийн бичиг, баримтад дөрвөн удаа өөрчлөлт оруулсан. Тухайлбал үйлдвэрийн хүчин чадалд өөрчлөлт оруулсан.

Эхний тендерийг тодорхой үндэслэлгүй цуцалж, хоёр дахь тендерийг хуулийн хүрээнд зохион байгуулсан Үнэлгээний хороог гурав дахь тендерийг зохион байгуулахаас гурав хоногийн өмнө өөрчилсөн. Улмаар “Админерал” ХХК, “Таван хур” ХХК болон “Монголиан контракт майнинг сервис” ХХК-д давуу байдал үүсгэх нөхцлийг бүрдүүлэх зориолготой байсан гэж үзэхээр байна.