А.Адъяасүрэн: Эрх баригчид хулгайлж болох бүхнийг хулгайлсан. Сүүлдээ иргэдийн сонгох эрхийг хулгайлах хуулиа батлах гэж байна

УИХ-ын 2024 оны ээлжит Сонгуулийн тойрог байгуулах тойргийн мандатын тоо, дугаар, нутаг дэвсгэрийн төвийг тогтоох тухай тогтоолын төслийг хэлэлцэж байна.

Энэ үеэр УИХ-ын гишүүн А.Адъяасүрэн хэлэхдээ “Тойрог томсгохоор улсаа аварна гэх ухуулга сүүлийн үед хүчтэй явж байна. Том тойрогтой ч үгээгүй ядуу улс их байгаа. Асуудлын гол нь тойргийн хэмжээ биш төр барьж байгаа хүмүүсийн тархинд байгааг яагаад ярихгүй байгаа юм бэ. 1990 оноос хойш буюу шинэ тогтолцоогоор явахаар шийдсэн хугацааны 90 хувьд нь коммунистууд засагласан.

Шинэ нийгмийг хуучин удирдлага, хуучин арга барилаар удирдуулсанд гол алдаа байгаа болохоос биш тойргийн хэмжээ ямар ч хамаагүй. Эрх баригчдын дундах дайны илрэл юм. Нуугаад байгаа болохоос биш дайн явагдаж байгаа. Үүнийг хуулийн хулгай гэж хэлнэ. Эрх баригчид биднээс хулгайлж болох бүхнийг хулгайлсан. Тэд хулгайгаа бусад руу чихэхдээ гарамгай. Үүнийг нүүрсний сонсгол яруу тодоор харуулж байгаа.

Найман жил засаглачхаад үндэсний баялгийг хулгайлж байгааг мэдээгүй дүр үзүүлж, шийдвэр гаргах эрх мэдэлгүй, хүний ачаа зөөж амьдардаг хүмүүс рүү хулгайгаа чихэхийг оролдож байгааг ард түмэн хараад сууж байгаа. Сүүлдээ бүр ард түмний сонгох эрхийг хулгайлах хуулиа батлах гээд сууж байна.

Яагаад Баян-Өлгий аймгийг нэг тойрог болгож байгаа юм. Энэ ялгаварлан гадуурхалт биш үү. Үүнийг би Монголын ардчилалд цэг тавьж байгаа өдөр гэж үзэж байна” гэв.