Т.Болормаа: Томуу, томуу төст өвчнөөр нярай хүүхдүүд хатгалгаагаар хүндэрч байна

Томуу, томуу төст өвчний нөхцөл байдлын талаар ЭМЯ-наас мэдээлэл өглөө.

Эх, хүүхдийн эрүүл мэндийн төвийн эмчилгээ эрхэлсэн дэд захирал Т.Болормаа: “ЭХЭМҮТ-ийн зөвлөх эмч нарын баг дүүргийн эмнэлэг, ор дэлгэсэн газруудад тандалтыг хийж байна. Томуугийн идэвхжилттэй үед хариу арга хэмжээ авч байна. Дараах зөвлөмжийг эцэг, эхчүүдэд хүргэж байна. Энэ удаагийн томуу, томуу төст өвчнөөр нярай хүүхдүүд хатгалгаагаар хүндрэх ажиглагдаж байна. Нярай хүүхдээ өрхийн эмч, сумын эмчдээ үзүүлээд давтан хоёр хоноод эргэж үзүүл гэсэн тохиолдолд эцэг, эхчүүд анхааралтай байх шаардлагатай байна. 

1. Нярай нь аминд аюултай шинжүүд:

• Өндөр халуурах,
• бөөлжих,
• хөхөндөө дургүй болох,
• унтаарах гэсэн шинжүүдийг анзааралгүй өнгөрөөж болохгүй. Эмнэлэгт цаг алдалгүй хандаарай.

2. Олон хүнтэй газар бага насны хүүхдээ дагуулж явахгүй байх, маск зүүх, гараа ариутгах энгийн ахуйн ариун цэврийг дагаж мөрдөхийг хүсэж байна. 

Мөн хүүхдийн дархлааг хэрхэн сайжруулах вэ гэж эцэг, эхчүүд асуудаг. Хүүхдийн дархлаа өөрөө онцлогтой. Хүүхдийнхээ дархлааг сайжруулъя гэвэл сайн унтуулах, сайн хооллох, хэт даруулах, халууцуулахгүй байх гэсэн зөвлөмжүүдийг дагах шаардлагатай. 

Ханиадны шинж тэмдэг илэрсэн хүүхдийг цэцэрлэг, сургуульд нь явуулахгүй байхыг зөвлөх багаас зөвлөлөө” гэв.