Хөгжлийн Банкны гэх хэргийн гэм буруугийн шүүх хуралдаан Улаанбаатар чуулгын байранд найм дахь өдрөө үргэлжилж байна.
Энэ үеэр “эрх мэдэл, албан тушаалын байдлаа урвуулан ашиглах” гэмт хэрэгт холбогдуулан Хөгжлийн Банкны Төлөөлөн Удирдах Зөвлөл (ТУЗ)-ийн хараат бус гишүүнээр ажиллаж байсан Ж.Үхэртар мэдүүлэг өгөв.
Тэрбээр “Миний хувьд “Монгол мах экспо” ХХК, “Монгол эм импекс концерн” ХХК, “Пирамид Орд” ХХК, “НВЦ” ХХК-ийн зээл олгох шийдвэрт гарын үсэг зурсан гэх үндэслэлээр буруутгагдаж байгаа.
Би ТУЗ-ийн хуралд оролцохдоо Хөгжлийн Банкны гол санаа, баримт бичигт тусгагдсан зүйлсийг баримталж гарын үсэг зурдаг байсан.
“Монгол мах экспо” ХХК-ийн төсөлд Эмээлт болон бусад жижиг зах дээр байгаа хог хаягдал, цусыг мах комбинат руу оруулж боловсруулаад Япон улсад маш өндөр үнээр өгөх үйлдвэрийн цех байна гэж байсан.
“Монгол эм импекс концерн” ХХК-ийн хувьд гаднаас эмээ авдаг манай улсад ашигтай юм байна гээд баярлаад дэмжсэн. Тугнагдсан эмийн үйлдвэр баригдана гэж байсан.
Энэ төслөөр бахархаж байснаараа би буруудаж байгаа юм уу. Зээл олгох асуудал яагаад буруутай болоод байгаа юм. Амьдрал зээл дээр тогтдог гэж ярьдаг. Тэгэхээр бидний харилцаа зээлтэй холбоотой байдаг.
Тухайн төслийг дэмжихийн тулд хүмүүстэй эвсэж, нэгдээгүй. Зээл олгох ял байдаг юм бол нийгмийн амьдрал явахад хүнд болно.
Хоёрдугаарт хурлын ирж бүрдээгүй гэх асуудал яригддаг. Дүрмийн дагуу бусад дарга нартайгаа холбоо бариад материалтайгаа танилцаад ирцээ бүрүүлдэг.
Мөрдөн байцаалтын явцад дээрх төслүүдийн зээл бүрэн төлөгдсөнд сэтгэл хангалуун байна. Би төслийн хүмүүстэй хуйвалдаж эвссэн зүйл байхгүй” хэмээн ярилаа.
+ There are no comments
Add yours