“Өөрийгөө “сайдын хүү” гэж нэрлэн танхайрсан иргэнд зөрчлийн хэрэг нээн шалгаж байна”

Өөрийгөө “сайдын хүү” гэж нэрлэж буй нэгэн иргэн, согтуугаар тээврийн хэрэгсэл жолоодож, улмаар бусадтай маргаж буй бичлэг цацагдаад буй.

Энэ талаар ЦЕГ-ын Хэвлэл мэдээллийн төвийн дарга Г.Мөнхбаяр “Цагдаагийн байгууллагад энэ оны есдүгээр сарын 1-2-ны өдөр шилжих шөнө Хан-Уул дүүргийн 11 дүгээр хорооны нутагт байрлах хотхоны зогсоолоос “Mercedes-Benz” маркийн автомашины жолооч 34 настай иргэн Д нь согтуугаар тээврийн хэрэгсэл жолоодож явахдаа Toyota Рrius-20, LEXUS 250 маркийн автомашиныг мөргөн бусдын эд хөрөнгөд хохирол учруулсан гэх гомдол мэдээлэл бүртгэгдсэн.

Уг мэдээллийн дагуу Хан-Уул дүүргийн замын цагдаагийн хэлтсээс зөрчлийн хэргийг нээж, шалгалтын ажиллагааг явуулж байна.

Мөн энэ сарын 26-ны өдөр цахим орчинд нийтлэгдсэн бичлэгт дээрх тээврийн хэрэгслийн жолооч, зорчигч нар нь бусдын амгалан тайван байдлыг алдагдуулсан байна. Ийм гомдол мэдээлэл өмнө нь цагдаагийн байгууллагад бүртгэгдээгүй байсан юм.

Одоогоор цахим орчинд нийтлэгдсэн дээрх зөрчлийн шинжтэй үйлдлийг зөрчлийн бүртгэлд авч, цагдаагийн байгууллагаас зөрчил шалган шийдвэрлэх ажиллагааг зохион байгуулж байгаа” гэлээ.