84-р дунд сургуулийн захирлын сонгон шалгаруулалтыг цуцалжээ

Хүчингүй захирамжаар захирлын албан тушаалын сул орон тооны сонгон шалгаруулалтыг зарласан талаар 84-р сургуулийн Үйлдвэрчний эвлэлээс мэдээлсэн. Харин тус сонгон шалгаруулалтыг Төрийн албаны зөвлөлөөс цуцалсан байна.

Асуудлыг сөхвөл, Нийслэлийн 84-р дунд сургуулийн Үйлдвэрчний эвлэлийн гишүүн Б.Цэрэндолгорын хэлснээр сонгон шалгаруулалттай холбоотой гаргасан Төрийн албаны зөвлөлийн шийдвэр, НЗД-ын захирамжуудыг хууль бус учир эсэргүүцэж байгаа гэв. Учир нь сургууль, цэцэрлэгийн захирлыг томилох болон чөлөөлөх эрх нь аймаг, дүүргийн засаг даргад байдаг ба энэ хүрээнд албан тушаалын тодорхойлолтыг гаргах эрхтэй. Гэтэл Баянзүрх дүүргийн Засаг дарга биш Нийслэлийн Засаг даргын захирамж байгаа нь хууль зөрчиж байна гэв.

Мөн өөр нэг асуудал нь өнөөг хүртэл хэрэгжүүлж байгаа сонгон шалгаруулалтын тодорхойлолтын нэг заалт нь тухайн хүн хэр их туршлагатайг илтгэдэг. БШУЯ-наас баталсан албан тушаалын үлгэрчилсэн тодорхойлолтод багшлах болон удирдах ажлын туршлагыг заавал тусгах ба шаардлагыг доод жишгийг тогтоохдоо сурагчдын тоо зэргийг тооцно гэсэн байдаг. Тус сургуулийн тухайд ЕБС-д 8-аас доошгүй жил ажилласан, тэргүүлэх ба түүнээс дээш зэрэгтэй, 4-өөс доошгүй жил удирдах ажил эрхэлсэн туршлагатай байх хэмээх заалтад нь хамаарахаар юм.

Гэтэл дээрхийг “…хуульд тусгайлан удирдах албан тушаалд ажилласан байх шаардлага заагаагүй учир хасах…” гэсэн тайлбарыг нэмж, ердөө таваас доошгүй жил багшилсан туршлагыг оруулсан байна. Сонгон шалгуулалтад үүнийг таваас доошгүй жил ажилласан туршлагатай багш хэмээн зааж босгыг нам болгосныг тэд эсэргүүцсэн юм.