Гадаад пасспортны хугацаанаас хамаарч виз сунгагдана

БНСУ-ын ХЗЯ-ны харьяа Цагаачлалын алба 2021.07.01-ээс эхлэн “Гадаадын иргэдийн визний сунгалтыг эзэмшиж буй гадаад паспортын хүчинтэй хугацаан дотор” хийхээр болсон байна.

Энэ нь гадаад паспортын хүчинтэй хугацаа хүртэл сунгана гэсэн үг биш боловч хэрвээ виз урт хугацаагаар олгогдох байсан ч паспортын хүчинтэй хугацаа богино байвал түүгээр нь сунгана гэсэн үг юм. (Жишээ нь: хөдөлмөрийн гэрээний E-9 визийг 3 жилийн хугацаагаар авах боломжтой байтал, паспортын хүчинтэй хугацаа 6 сар үлдсэн байвал визийг 6 сараар л сунгаж өгөх ба паспорт шинээр авсны дараа дахин Цагаачлалын албанд очиж, дахин төлбөр төлж визээ сунгуулах шаардлагатай болно. Мөн хэлний курст суралцагчийн D-4 визийг 1 жилийн хугацаагаар олгогдох боломжтой байтал, паспортын хүчинтэй хугацаа 4 жил учир тэр хүртэл сунгах ёстой гэж ойлгож болохгүй, дээд хугацаа 1 жилээр нь сунгаж өгдөг гэх мэт)

Энэ журамд хамаарахгүй визний ангилал: F-5, F-2-4, G-1-6

Иймд манай иргэд шинээр виз авах, сунгах зэрэгтээ эзэмшиж буй Монгол Улсын гадаад паспортын хүчинтэй хугацаагаа нарийн шалгаж байна уу.

ПУСАН ХОТОД СУУГАА КОНСУЛЫН ГАЗАР