Ерөнхийлөгч Оюу толгойтой холбоотой сөрөг нэхэмжлэл гаргах зарлигийг Засгийн газарт хүргүүллээ 

Монгол Улсын Ерөнхийлөгч Х.Баттулга Засгийн газарт зарлиг хүргүүлсэн талаараа УИХ-ын чуулганы танхимд мэдээллээ.

Тэрбээр Ерөнхийлөгчийн хувиар Засгийн газарт хандаж нэн даруй сөрөг нэхэмжлэл гаргах холбогдох арга хэмжээ авах чиглэл өгөх тухай зарлигыг хүргүүлсэн гэдгээ хэлсэн юм.
Ерөнхийлөгч Х.Баттулга “Дөрөвдүгээр сарын 30-нд Монгол Улс Лондонгийн арбитрт сөрөг нэхэмжлэл гаргах хугацаа болно. Оюу толгой компанийн нэхэмжлэлээр Лондонгийн олон улсын арбитрын шүүхэд Монгол Улсын Засгийн газрыг хариуцагчаар татан дуудсан маргаанд дөрөвдүгээр сарын 30-нд багтаан Монгол Улсын Засгийн газар хариу няцаалт хийх, байр сууриа илэрхийлэх хуваарь тов гарсан мэдээллийг Ерөнхийлөгчийн ажлын албаны төлөөлөл долоо хоногийн өмнө авсан.
Маргааны хүрээнд Монгол Улсын Засгийн газар хууль зүйн үйлчилгээ үзүүлэгч дэлхийн шилдэгт тооцогдох зөвлөх байгууллага нь Оюу толгойн гэрээг тойрсон авлигын шинжтэй, онц ноцтой үйл баримтууд дэлхийн зургаан орны шүүхэд явагдаж буй баримтаар илэрч тогтоогдсон, гэрээ байгуулахад шүдарга бус арга хэрэглэсэн явдлыг арбитрын шүүхэд сөргүүлэн тавих замаар Монгол орон өөрсдийн зөрчигдсөн эрх ашгийг сэргээн эдлэх боломжтой гэх агуулгаар сөрөг нэхэмжлэл гаргахыг удаа дараа зөвлөмжөөр ирүүлсээр байжээ.
Өөрөөр хэлбэл, манай улс сөрөг нэхэмжлэл гаргаснаар хөрөнгө оруулагч талтай харилцан ашигтай, нээлттэй хамтран ажиллах түүхэн бололцоог олоод буй онцгой цаг үе тохиосон байна” гэсэн юм.