Булган аймгийн гишүүд О. Амартүвшинг дэмжихээ илэрхийллээ

Ардчилсан намын ээлжит бус 20 дугаар хурлаараа намын даргад өрсөлдөх нэр дэвшигчдээ тодруулж батламжилсан. Өнөөдөр АН-ын даргыг сонгох сонгуульд нэр дэвшиж байгаа Отгондаваагийн Амартүвшин, Сүхбаатарын Эрдэнэболд, Одонгийн Цогтгэрэл, Даваахүүгийн Пүрэвдаваа нар орон нутгийн гишүүд, дэмжигчидтэйгээ хийх цахим уулзалтыг zoom-ээр холбогдож Булган, Архангай, Баянхонгор аймгийн гишүүд, дэмжигчдээр эхлүүллээ.
Монгол Улсын түүхэнд анх удаа улс төрийн намын даргад өрсөлдөж байгаа нэр дэвшигчид цахим уулзалтыг zoom-ээр холбогдож, орон нутгийн гишүүд дэмжигчидтэйгээ хийж байгаа нь түүхэн онцлогтой бөгөөд богино хугацаанд олон мэдээллийг нэг дороос сонирхогч, дэмжигчид, гишүүддээ хүргэж байгаагаараа давуу талтай.
Цахим уулзалтаар намын даргад нэр дэвшигчид Мөрийн хөтөлбөрөө танилцуулж, гишүүд, дэмжигчидтэйгээ санал бодлоо хуваалцсан юм. Дашрамд дурдахад, цахим уулзалтыг эхлүүлсэн Архангай, Баянхонгор, Булган аймгаас холбогдож санал бодлоо хэлсэн гишүүд намын даргад өрсөлдөж байгаа нэр дэвшигчдийг дэмжиж байгаагаа шууд илэрхийлж байсан. Тухайлбал, Булган аймгаас холбогдож байгаа гишүүд, дэмжигчид АН-ын даргад нэр дэвшиж байгаа Отгондаваагийн Амартүвшинг дэмжиж байгаагаа илэрхийлсэн.