Засгийн Газар нь оюуны өмчийн хулгайч уу?

Гэрэл зурагчин Б.Батгэрэл цахим хуудсандаа Монгол Улсын Засгийн газрын бэлтгэн хүргэсэн Засаг цаг- Залгамж нэвтрүүлэгт түүний дүрс, зургийг оюуны өмчийн зөвшөөрөлгүй ашигласан тухай нийтэлжээ.

Б.Батгэрэл: “Монгол Улсын Засгийн газрын бэлтгэсэн нэвтрүүлэг оюуны өмчид ноцтойгоор халдав. Дэлхий даяараа оюуны өмчийн тал дээр маш өндөр анхаарч засаг төр нь хуулиараа хамгаалж байхад хууль тогтоогч байгууллага Монголын засгийн газар өөрөө ингээд хүний бүтээлийг шууд ямар ч зөвшөөрөлгүйгээр дүрс бичлэгийн тамгыг хасан, бүтээлийн эзний нэрийг дурьдалгүй ашиглан телевиз, вэд сайтууд. олон нийтийн сүлжээ болон өөрийн албан ёсны хуудсаар хүртэл олон өдөр олон цагийн давтамжаар цацаж маш том алдаа хийв. Би төр засаг юм чинь яахав гээд дуугүй өнгөрөх ёстой юу.

Засгийн газрын хэвлэл мэдээллийн алба надтай яаралтай холбогдож тайлбар хийж, уучлалт гуйж нөхөн төлбөр төлөхийг шаардаж байна. Бид оюун санаа, урлаг уран бүтээлийн үнэ цэнээ хамгаалж байж чанартай бүтээлүүд бий болгож ард түмэн, гадаад орны зах зээлд үзүүлэх сайн зүйлсийг хийж бүтээж чадна шүү дээ.

Оюуны өмчийг дээдэлдэг, хамгаалдаг улсын хөгжил олон шатаар түрүүлж явдаг. Төр нь хүртэл хулгай хийж байхад бид ямар урам зоригоор, юунд итгэж найдаж ажил хөдөлмөрөө хийж, татвараа төлж, ирээдүйгээ яаж төсөөлж амьдрах юм бэ! Ц.Ганзориг дарга та тайлбар өгнө үү” хэмээн Bagi Max цахим хуудсандаа нийтэлжээ.