Албан тушаалаа ашиглаж хахууль авсан хэргээр түр саатуулагдан суллагдсан Х.Оргил-Эрдэнэ, шинжилгээ будлиантуулсан Х.Түвшин-Эрдэнэ нар төрсөн ах дүү нар байсан гэдэг мэдээлэл олдов. ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ, Шүүхийн шинжилгээний үндэсний хүрээлэнгийн шинжээч эмч Х.Түвшин-Эрдэнэ гэх нэрийг хэвлэлийн хуудас болон цахим орчинд цөөнгүй харж байгаа, ойрын өдрүүдэд Албан тушаалаа урвуулан ашигласан хэргээр хууль, шүүхийн байгууллагад дуудагдаад байгаа тэд төрсөн ах дүүс аж. Өөрөөр хэлбэл, Шүүхийн шинжилгээний үндэсний хүрээлэнгийн шинжээч эмч Х.Түвшин-Эрдэнэ ЗТХЯ-ны Замын ашиглалт, засварын хэлтсийн дарга Х.Оргил-Эрдэнийн төрсөн ах байж таарав.
ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ 2019 оны арванхоёрдугаар сарын 30-нд албан өрөөндөө 20 000 юанийн хахууль аваад сууж байхдаа АТГ-ын ажилтнуудад баригдсан. Тэрбээр Улаанбаатараас Дархан-Уул аймаг чиглэлийн авто замын нэгдүгээр багц буюу баруун аймгууд руу салах тойргийн уулзвараас Хар модот (52-ын) давааны ар хүртэлх 37.26 км авто замын ажлыг гүйцэтгэж буй БНХАУ-ын хөрөнгө оруулалттай “Хэйлонжиан жиньеи рөүд энд бридж” компанийн эрх бүхий албан тушаалтнаас дээрх хэмжээний хахууль авсан баримт нь хавтаст хэрэгт авагдсан гэх мэдээлэл бий. Түүний энэ хэргийн мөрдөн байцаалтын ажиллагаа одоо хийгдэж байгаа юм.
Харин түүний төрсөн ах Х.Түвшин-Эрдэнэ 2002 оны Эрүүгийн хуулийн тусгай ангийн 256 дугаар зүйлийн 256.1 /Хүч хэрэглэх, эд хөрөнгийг нь устгахаар заналхийлэх, шан харамж өгөх зэргээр гэрч, хохирогчоор худал мэдүүлэг өгүүлсэн, шинжээчээр худал дүгнэлт гаргуулсан, орчуулагчаар худал орчуулуулсан, хэлмэрчээр худал хэлмэрчлүүлсэн бол /-дэх хэсэгт зааснаар 1 жилийн хугацаагаар хорих ял сонсож буй.
Хамгийн гол нь төрсөн ах дүү хоёр хахууль, албан тушаалын хэргээр шалгагдаж байгаа нь анхаарал татаж байгаа юм. Ял сонссон шүүх эмнэлгийн шинжээч эмчийн дүү ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ ямар хариуцлага хүлээх талаар бид эргэж мэдээлэх болно.
+ There are no comments
Add yours