Засгийн газрын өчигдрийн ээлжит хуралдаанаар хэд хэдэн албан тушаалтан үүрэгт ажлаасаа чөлөөлөгдөх өргөдлөө өгснийг, шийдвэрлэжээ. Үүнд БСШУСЯ-ны Төрийн нарийн бичгийн дарга Б.Баярсайхан, БОАЖЯ-ны Төрийн нарийн бичгийн дарга Ц.Цэнгэл, Хил хамгаалах ерөнхий газрын дарга Ц.Сэргэлэн нарын ажлаас чөлөөлөгдөх хүсэлтийг хүлээн авч, шийдвэр гаргажээ.
Төрийн албан хаагч сонгуульд өрсөлдөх бол сонгуулийн жил гарахаас өмнө үүрэгт ажлаасаа чөлөөлөгдсөн байх тухай хуулийн заалттай холбоотойгоор албан тушаалтнууд үүрэгт ажлаасаа чөлөөлөгдөж эхэлжээ. БСШУСЯ-ны Төрийн нарийн бичгийн дарга Б.Баярсайханы хувьд АНУ-ын Санфранциско хотод энэ онд байгуулагдсан Консулын газарт консулаар томилогдох тухай мэдээлэл гарч буй юм.
