Засварын ажил гүйцэтгэхэд саад учруулж буй зөвшөөрөлгүй гаражуудыг албадан буулгаж байна

Баянгол дүүргийн 19 дүгээр хороо, 52 дугаар байрны зүүн талд дулааны эрчим хүчний 7в, г, д, и, к магистраль төв шугамын 2019 оны зуны засварын ажлыг гүйцэтгэхэд саад учруулж байгаа зөвшөөрөлгүй гурван ширхэг төмөр гараж, есөн ширхэг тоосгон гаражийг албадан буулгаж дулааны шугамын хамгаалалтын зурвасыг чөлөөлөхөөр ажиллаж байна.

Чингэлтэй дүүргийн 19 дүгээр хороо, Майхан толгойн зусланд орц гарц нарийсгаж зөвшөөрөлгүй барьсан хашааг албадан буулгаж явган хүн болон авто машин чөлөөтэй зорчих нөхцлийг бүрдүүлжээ. Мөн тус дүүргийн 19 дүгээр хороо, Шадивлангийн зусланд ойн сан бүхий газарт зөвшөөрөлгүй барьсан хашааг чөлөөлсөн байна.

Түүнчлэн Сүхбаатар дүүргийн 10, 11, 12 дугаар хороо, Цагдаагийн гудамжны 1,6км авто замын өргөтгөл, шинэчлэлтийн ажил хийх нөхцлийг хангахаар 100 айлын уулзвараас 32-ын тойрог хүртэл замын трасст өртсөн ТҮЦ-үүдийг албадан чөлөөлж байгаа аж.

Баянгол дүүргийн зургадугаар хорооны нутаг дэвсгэрт буюу “UB palace”-ийн хойд талын үерийн далан дагасан авто замыг “П.Н.Шастины нэрэмжит улсын гуравдугаар төв эмнэлэг”-ийн арын замтай холбох 1.2км авто замын ажил хийх нөхцлийг хангахаар уг замын трасст өртсөн, зөвшөөрөлгүй барьсан гараашуудыг буулгаж газар чөлөөлөхөөр ажиллаж байна.

Сүхбаатар дүүргийн долдугаар хороо, Денверийн гудамжид зөвшөөрөлгүй барьсан обьектийг албадан буулгаж нийтийн эзэмшлийн зам талбай, орц гарцыг чөлөөлөхөөр тус тус ажиллаж байна.