Л.Болормаа: Иргэдийнхээ амьд явах эрхийг хамгаалж чадаагүй сайд огцор

Цагдан хорих байранд амиа алдсан шүүгчийн талаар болон үүнтэй холбоотой зарим асуудлаар хуульчдын төлөөлөл өнөөдөр мэдээлэл хийлээ.

Нийгмийг цочроон гарч буй сүүлийн үеийн хэргүүд бүгд төрийн байгууллагуудтай холбогдож байгаа учраас Хууль зүй, дотоод хэргийн сайд Ц.Нямдорж хариуцлага хүлээж сайн дураараа огцрох хэрэгтэй гэдгийг хуульчид хэллээ.

Хуульч, өмгөөлөгч Г.Оросоо “Хэд хоногийн өмнө хууль зүй дотоод хэргийн яамны харьяа ШШГЕГ-ын цагдан хорих 461 дүгээр ангид шүүгч Л.Бямбаа амь насаа алдсан хэрэг гарсан. Ер нь төрийн тусгай хамгаалалттай газар, төрийн байгууллагад Монгол Улсын иргэн амь насаа алдаж байгаа анхны тохиолдол энэ ганц биш гэдгийг хэлмээр байна. Хэрвээ санаж байгаа бол зам тээврийн яамны удирдах албан тушаалтан бусдын гарт хэрцгийгээр амь насаа алдсан. Энэ хүн бас хуульч, Нийслэлийн том дүүргийн Удирдах албан тушаалтан бусдад хутгалуулж гэмтэл авсан. Увс аймгийн Баруунтуруун суманд  байлдагч амиа хорлосон гэх хэрэг гарсан. Дээрээс нь  Дорноговь аймгийн Зүүнбаян суманд байдаг цэргийн ангийн байлдагч  амь насаа алдсан гэх хэргүүд гарсан. Нийгмийг цочроосон гэмт хэргүүд цуврал хэрэг шиг гардаг боллоо. Монгол Улс үндсэн хуулиндаа баталгаатай амьд явах эрхтэй гэж заасан мөртлөө энэ хууль зөрчигдөж байна. Саатуулах байранд байсан хүн хүртэл амиа алдаж байна. Монгол Улс зэрлэгшсэн нийгэм рүү явж байна. Хуульчид нийгмийн инженер байх ёстой. Бид нар өнгөрсөн хэргүүдэд зүгээр сонсоод өнгөрсөн. Одоо тэвчихгүй.  Монголын төр хүний эрхийн хувьд террорист шиг болчихлоо.

Монгол Улсад гэмт хэргээс урьдчилан сэргийлэх, гэмт хэрэгтэй тэмцэх үүргийг Хууль зүй, дотоод хэргийн яам хүлээж байгаа ч үүргээ хнгалттай биелүүлэхгүй байна. Ийм ноцтой хэрэг гарсан байхад Хууль зүй, дотоод хэргийн сайд Ц.Нямдорж таг дуугүй байгаад олон мянган төрийн албан хаагч, талийгаачийн ар гэр, төрөл садан, нийгмийн бухимдлыг түрүүлж байна.

Ингэж иргэд амь насаараа хохирч, амиа хорлолт газар авч байгаад Монгол Улсын Үндэсний аюулгүй байдлын зөвлөл нэн яаралтай анхаарал хандуулахыг уриалж байна.

Цагдан хорих ангид камер дутсан, төсөв мөнгө дутсан гэж ярьж байгаа нь  яагаад ч байж болохгүй зүйл. Хариуцлага алдсан байгууллага мэдээллээ ил тод болгох сонирхол алга байна. Бид талийгаачийн өмгөөлөгчтэй холбогдоогүй. Дотоод асуудал руу орохгүй. Цаашид дахин ийм хэргүүд давтагдахаас сэргийлж мэдээлэл хийж байна. Түүнээс биш нам, улс төрийн зорилго бидэнд огт байхгүй гэдгийг хэлмээр байна. Шинэ эрүүгийн хуулиар зайлшгүй шалтгаантай биш л бол хүнийг саатуулахгүй байцааж болно.

Манайхны хуучны арга болох цагдан хорьж, баривчлан саатуулах арга хэвээр байгаад харамсаж байна. Тодорхой хязгаар тогтоогоод цагдан хорихгүй байж болдог. Ер нь талийгаач 48 цаг саатуулагдаад гарах хооронд амиа хорлох хэмжээний хүн биш. Хуулийн байгууллага үнэн зөвийг нь тогтоох байх гэдэгт итгэж байна.

Нэг хэрэг гардаг, тэгээд мартдаг энэ байдлаа орхих хэрэгтэй” гэв.

Харин хуульч, өмгөөлөгч  Л.Болормаа “Өнөөдөр Монгол Улсад хүний эрх зөрчигдөж байна. Монгол Улсын Ерөнхий сайд, хууль зүй дотоод хэргийн яамны сайд нар амь насаа алдаж байгаа хүмүүсийн өмнө хариуцлага хүлээх хэрэгтэй. Амь насаараа хохироод үлдчихсэн байхад яагаад хууль зүй дотоод хэргийн сайд мэдээлэл өгдөггүй юм. Яагаад ард түмнээсээ уучлалт гуйдаггүй юм. Яагаад амиа алдаад долоон цаг болж байхад нь ар гэрийнхэнд нь мэдэгдэж байгаа юм бэ.

Амьд явах эрх ноцтойгоор зөрчигдөж байгаа олон асуудалд иргэдийнхээ амьд явах эрхийг хамгаалж чадаагүй Хууль зүй, дотоод хэргийн сайд Ц.Нямдоржийг ард түмнээсээ уучлалт гуйж, сайн дураараа огцрохыг шаардаж байна” гэсэн юм.

Мөн хуульч, өмгөөлөгч Ц.Билэгсүх “Хуулийн салбарт удаа дараа ийм ноцтой асуудлууд гарч байгаад шүүмжлэлтэй хандах ёстой. Зүгээр энгийн гардаг хэрэг шиг орхих ёсгүй гэж бодож байна. Сая гарсан хэрэг болох 461 дүгээр цагдан хорих ангид гарсан хэрэгт хариуцлага хүлээх юм уу эсвэл ямар байр суурьтай байгаа талаараа Хууль зүй, дотоод хэргийн сайд хариуцлага хүлээ. Эсвэл холбогдох албан тушаалтнууд нь хариуцлага хүлээх хэрэгтэй байна. Мөн Шүүхийн шинжилгээний үндэсний хүрээлэнд янз бүрийн хэргүүд очиход урваж буцсан, хуйвилдсан гэх асуудлууд удаа дараа гарч байна. Үүнд ч бас тайлбар хийх хэрэгтэй” гэв.

+ There are no comments

Add yours