Өнгөрөгч арванхоёрдугаар сард Баян-Өлгий аймгийн Баяннуур сумын ерөнхий боловсролын бүрэн дунд сургуулийн дотуур байранд амьдардаг 40 гаруй хүүхэд хоолонд хордож эмнэлэгт хүргэгдсэн хэрэг гарсан. Уг асуудалтай холбогдуулан ажлын хариуцлага алдсан сургуулийн удирдлага, ажилтнуудад хариуцлага тооцох тухай эрх бүхий албан тушаалтнуудад санал хүргүүлэхээр болсон талаар аймгийн Мэргэжлийн хяналтын газраас мэдээлснээр асуудлыг шийдээд өнгөрч байв.
Тус хэрэг хэрхэн шийдэгдсэн талаар асуудал намжиж амжаагүй байхад Баян-Өлгий аймагт сургуулийн дотуур байрны хүүхдүүд хордсон хэрэг дахин гарчээ.
Тодруулбал, тус аймгийн Цэнгэл сумын ерөнхий боловсролын сургуулийн дотуур байранд амьдардаг гурван хүүхэд хордлогод орсон хэрэг энэ долоо хоногийн эхээр гарсан байна. Дотуур байрны гал тогоонд ариун цэврийн шаардлага хангаагүйн улмаас нэг хүүхэд эмнэлэгт хүргэгдэж, хоёр хүүхэд дотуур байрандаа эмчлүүлж байгаа аж.
Улмаар эмч нар хордсон хүүхдүүдэд үзлэг хийж, шинжилгээ авчээ. Мөн хүүхдүүдийн идэж уусан хоол, ундны уснаас дээж авч лабораторийн шинжилгээнд оруулахаар аймгийн төв рүү явуулсан тухай албаныхан мэдээллээ.
Сургуулийн удирдлага, ажилтнуудын ажлын хариуцлага сул, ажилдаа хайнга ханддаг, сурагчдын сурч, амьдрах орчин зохих ёсоор бүрдээгүй, эрүүл ахуйн дэглэм зөрчигдсөн зэрэг зөрчлүүдээс болж дотуур байрны сурагчид идэж байгаа хоолноосоо хордох тохиолдол ойр ойрхон давтагдан гарч байна. Нөгөө талаар Зөрчлийн тухай хуулийн дагуу холбогдох хүмүүст хариуцлага тооцох нэрийдлээр, албан шаардлага хүргүүлээд өнгөрдөг байдал хүүхдүүдийг хохироогоод байгаа хэмээн дүгнэгдэж буй юм.
Иймд аймгийн мэргэжлийн хяналтын байгууллага, Эрүүл мэндийн газар, Аймаг, сумдын удирдлагууд урьдчилан сэргийлэх хяналт шалгалтаа зохих журмын дагуу хийж гүйцэтгэж, мэргэжлийн алдаа дутагдал гаргасан тохиолдолд зохих арга хэмжээ авч ажиллах шаардлагатайг дахин давтагдсан хордлогын хэргүүд сануулсаар байна.
+ There are no comments
Add yours