Ч.Улааныг ХХААХҮ-ийн сайдад томилох асуудлыг хойшлууллаа

УИХ-ын чуулганы хуралдаанаар Хүнс, хөдөө аж, ахуй хөнгөн үйлдвэрийн сайдад УИХ-ын гишүүн Ч.Улааныг томилох эсэх асуудлыг хэлэлцэх гэсэн боловч тогтоолын төслийг Ерөнхий сайд У.Хүрэлсүх УИХ-д танилцуулаагүй гэдэг үндэслэлээр хойшлууллаа.

УИХ-ын нэр бүхий 40 гишүүн УИХ-ын дарга М.Энхболдыг огцортол чуулганы хуралдаандаа суухгүй гэж бойкот зарласан. Бойкот үргэлжилж өнөөдөр зарим гишүүд чуулганы танхимын гадна суулт зарлаад байна. Мөн Засгийн газрын гишүүд хуралдаа суухгүй байгаа нь Ч.Улааныг ХХААХҮ-ийн сайдад томилох асуудлыг ийнхүү хойшлуулахад хүргэлээ. Харин УИХ-ын дарга М.Энхболд “Г.Занданшатар сайдыг сайд нараа хуралдаа суулгахыг шаардаж байна” хэмээн анхааруулсаар байна.

Засгийн газрын гишүүд болон нэр бүхий гишүүдийн бойкоттой холбогдуулан УИХ-ын гишүүд горимын санал хэлсэн юм.

Тухайлбал, УИХ-ын гишүүн О.Баасанхүү “Би Ч.Улаан сайдаас ичээд байна. Өөрийгөө томилох асуудлыг оруулж ирэхээр чуулганы хуралдаанд орж ирээд суунгуутаа, өөрийг нь дэмжихгүй ирцийг хараад картаа сугалчих юм. Би аль ч талд нь ормооргүй байна. Би яагаад болих ёстой юм. Би хулгай хийгээгүй, ЖДҮ-дээгүй. Маргааш танай намын таван гишүүний асуудал маргааш орж ирэх юм билээ. Өөрсдөө нэрсээ татах биз.

УИХ-ын гишүүн Ж.Мөнхбат “Монголын төр эмгэнэлт драм руу орлоо. Засгийн газрын гишүүд командаар УИХ-ын үйл ажиллагааг бойктолж байна. Энэ Засгийн газарт Монголын ард түмний хамгийн гол салбар болсон ХХААХҮЯ хамаагүй болжээ. Л.Болд, Ж.Батзандан, Т.Аюурсайхан, Л.Оюун-Эрдэнэ гишүүн нар шударга ёсны төлөө явж байгаа юм бол УИХ-ыг тараах миний бланк дээр гарын үсгээ зур. Эрх барьж байгаа МАН төр, засгийг доромжилж болохгүй. Дарга, сайд нарын албан тушаалдаа ямар хайртай, үхэн хатан хамгаалдаг юм. Засгийн газар өөрсдөө саналаа өгөөд огцор. Бидэнтэй, бидэнгүй Монгол төр шүү. Амин хувийн эрх ашгаа эх орны дээр тавьж, битгий дарвалзаад байгаарай та нар” гэлээ.

Мөн зарим гишүүд Засгийн газраас асуудлаа танилцуулж хэлэлцүүлэхгүй байгаа учир хүлээхгүйгээр дараагийн хэлэлцэх асуудал руугаа орох саналыг гаргасны дагуу Байнгын хорооны бүтэц, бүрэлдэхүүнд өөрчлөлт оруулах асуудлыг хэлэлцлээ.