Өсвөр насны 20 хүүхдийг хугацаанаас нь өмнө тэнсэн суллажээ

“Хүүхдийн хорих” гэх тодотголтой Шүүхийн шийдвэр гүйцэтгэх ерөнхий газрын харьяа “Сургалт хүмүүжлийн тусгай байгууллага”-д хүмүүжиж байсан өсвөр насны 20 хүүхдийг хугацаанаас нь өмнө тэнсэн сулласан байна.

Баянзүрх дүүргийн Эрүүгийн хэргийн анхан шатны шүүхийн ерөнхий шүүгч Н.Одонтуулын даргалсан хуралдааны шийдвэрээр тэдгээр хүүхдүүдийг суллажээ. Ял эдлэх хугацаанаасаа өмнө суллагдсан хүүхдүүд шүүхэд баярласан сэтгэгдлээ илэрхийлж, дахин алдахгүй гэсэн амлалт өгсөн аж. Мөн эцэг, эхийнхээ үгэнд орох хамгийн чухал гэдгийг ойлгосноо хэлж, аав ээждээ үнсүүлэхээр яарч байгаа, гараад зөв амьдарна гэж бодож байгаа тухайгаа илэрхийлсэн байна.

Хоригдох хугацаандаа элсэлтийн ерөнхий шалгалт өгч, МУБИС-д элссэн хүү хэлэхдээ “Оюутан болсныг минь харгалзаж, хугацаанаас өмнө сулласан шүүгчид маш их баярлаж байна. Энд ар гэрийн хайр халамж, хараа хяналт сайн хүүхдүүд яаж хурдан хүмүүжиж гараад зөв амьдрах вэ гэж хичээж, ярьдаг. Ар гэрээс нь эргэлт ирдэггүй, эцэг, эх нь хайхардаггүй хүүхдүүд эсрэгээрээ хэн нэгнийг буруутгаж, амьдралд гутранги үзэлтэй болсон нь ажиглагддаг.

Хууль хяналтын байгууллагууд гэмт хэргээс урьдчилан сэргийлэх зорилгоор өсвөр насны хүүхдүүдэд үр дүнтэй сургалтуудыг хангалттай хийдэг бол олон хүүхдүүд өнөөдөр гэрэл гэгээтэй амьдралтай, алдаж хазайх нь бага байх байсан байх. Миний эдлээгүй үлдсэн 1 жил 2 сар 27 хоногийг хугацааны өмнө сулласан шүүх бүрэлдэхүүндээ, төр засагтаа маш их баярлалаа” хэмээн ярьжээ.