Завхан аймгийн Дөрвөлжин сумын нутаг, Хомын талын байгалийн цогцолборт газарт очиж, тахийн сүрэгтэй танилцах боломжтой.
Хомын талын байгалийн цогцолборт газарт “ТАХЬ” эко жуулчны бааз өнгөрсөн жил үүд хаалгаа нээсэн. Улаанбаатар хотоос 1400 километрийн алсад орших байгалийн өвөрмөц сайхан тогтоцтой энэхүү цогцолбор газарт дотоодын болон гадаадын тусгай сонирхлын аялал жуулчлалыг хөгжүүлэх нь зайлшгүй шаардлагатай байв.
Хомын талын тахь сэргээн нутагшуулалт, идэвхтэй хамгааллын үр дүнд өсөн олширч, ирж суурьшсан нэн ховор, ховор олон зүйлийн амьтан ургамал, биологийн олон янз байдлын тухай мэдлэг мэдээллийг эндээс жуулчид авах боломжтой.
Мөн тусгай хамгаалалттай газар нутгийн онцлог шинж байдал, ач холбогдлыг хүмүүст илүү сайн танилцуулах боломж бүрдээд буй нь энэ юм.
Энэ жил гэхэд Франц улсаас Монгол Улсад суугаа Эрхэмсэг ноён Элчин сайд Себастьян Сүрүн, түүний гэргий Шарлотта Сүрүн нар Хомын талын Байгалийн цогцолборт газраар зочилж, Тахь баазад тухлан саатжээ.
-Тэртээ 20 жилийн өмнө Хомын талын анхны 22 тахь Франц улсаас ирсэн гэдгийг мэдэх байх. Тэгвэл Элчин сайд өнгөрсөн хугацаанд Shadowfax, Bucéphale хэмээх 2 унага үрчлэн авч, бидний ажил үйлсийг тууштай дэмжигч гэдгийг дуулгаж байна. Элчин сайд Шадовфаксийн сүрэгт дуран сунгаж, 100 хувь нарны эрчим хүчээр ажиллах, өндөр хурдтай Старлинкийн интернэт гээд бидний үйлчилгээ түүнд таалагдсанд баяртай байна.
Мөн Холбооны Бүгд Найрамдах Герман Улсаас Монгол Улсад суугаа Элчин сайд Хэльмут Кулитц, хамт олноороо Хомын талын Байгалийн цогцолборт газарт байрлах Тахь эко баазад зочлон ирж, тахь сэргээн нутагшуулж буй бидний 20 жилийн ажлын туршлага байгаль хамгааллын үр дүнтэй танилцсан юм.
Бид Германы техникийн хамтын ажиллагааны “Тусгай хамгаалалттай газар нутгуудад дэмжлэг үзүүлэх замаар экосистемийг хадгалан хамгаалахад хувь нэмэр оруулах нь” (SPACES) төсөл болон ХБНГУ-ын Сэргээн Босголт Хөгжлийн банкны “Биологийн олон янз байдлыг хамгаалах, уур амьсгалын өөрчлөлтөд дасан зохицох” төслүүдтэй нягт хамтран ажилладаг.
Өнгөрсөн жилийн 9-р сард Францаас анхны жуулчдаа хүлээн авснаас хойш өнөөдрийн байдлаар 100 гаруй жуулчин манайхыг зорин иржээ. Тиймээс Хомын талын эзэн тахийн талаар илүү ихийг мэдэж авахыг хүсвэл Хомын тал нутгаар аялах, эко аяллыг санал болгож байна. Энэхүү жуулчны баазаас тахийн талаарх бүхий л төрлийн мэдээллийг авахаас гадна, тахийг хэрхэн хамгаалж буй судалгааг биеэр үзэж, байгаль хамгаалагчид, нутгийн уугуул иргэдийн аж ахуйтай танилцаж, тэдний үйлдвэрлэдэг бүтээгдэхүүнүүдээс худалдан авах боломжтой юм гэж Хомын талын тахь ТББ-аас мэдээлэв.
Франц улсаас Монгол Улсад суугаа Эрхэмсэг ноён Элчин сайд Себастьян Сүрүн, Хомын талын тахь ТББ-ын тэргүүн Ц.Мөнхбат
Франц улсаас Монгол Улсад суугаа Эрхэмсэг ноён Элчин сайд Себастьян Сүрүн, түүний гэргий Шарлотта Сүрүн нар Хомын талд
Холбооны Бүгд Найрамдах Герман Улсаас Монгол Улсад суугаа Элчин сайд Хэльмут Кулитц хамт олноороо Хомын талд
Хомын талын тахь
