“Төлчин эмэгтэйчүүдийн чуулган” арга хэмжээ боллоо

Идэр сумын ИТХ, ЗДТГ-аас жил бүр “ Төлчин эмэгтэйчүүдийн чуулган” арга хэмжээг сумандаа зохион байгуулдаг.

Энэ удаагийн чуулганд аймгийн Засаг даргын орлогч Ц.Улам-Оргих оролцож малчдад чиглэсэн Засгийн газрын бодлого шийдвэрийг танилцуулж, тэдний тулгамдсан асуудлуудын талаар ярилцлаа.

Мөн “Дөрвөн алтан бэрс” малчдын холбооны тэргүүн Б.Тамир мал маллах дэвшилтэт арга туршлага, газар нутгийн байршилд тохируулан мал сүргийг хэрхэн маллах, сүргийн бүтцийг сайжруулах зэрэг асуудлуудаар сургалт оров.

Түүнчлэн Монгол Улсын сайд, ЗГХЭГ-ын дарга Д.Амарбаясгалангийн санаачлан орон даяар хэрэгжүүлж буй “Шинэ хоршоо” малчдад зориулсан хөдөлгөөний талаарх мэдээллийг сургагч багш нар өглөө.

Бэлчээр нутаг хомсдон цөлжиж, малын ашиг шим багасаж, малчид хот суурин бараадсаар байгаа энэ цаг үед малчдад зориулсан төрийн дорвитой, үр дүнтэй бодлого зайлшгүй шаардагдаж байна. Тиймээс ч “Шинэ хоршоо” хөдөлгөөн өрнөж эхэллээ. Уг хөдөлгөөний гол зорилго нь малчин өрх бүрийн сарын орлогыг 5 сая төгрөгөөс дээш хэмжээнд хүргэх явдал юм.

Түүний нэг жишээ нь малчид Зээлийн батлан даалтын сангийн 80-100 хувийн батлан даалтын дэмжлэгтэйгээр 50 хүртэлх сая төгрөгийг жилийн 6 хувийн хүүтэй хөрөнгө оруулалтын зээлээр авах боломж бүрдэж байгаа юм. Улмаар малчид хамтарсан хөдөлмөр эрхэлж, өөрсдөө өндөр орлоготой, үндэсний үйлдвэрлэгчид түүхий эдтэй, хот суурин газрын иргэдэд чанартай мах сүүг тогтвортой үнээр авах давуу талууд үүснэ.

“Шинэ хоршоо” хөдөлгөөнийг төлчин эмэгтэйчүүд дэмжиж байгаагаа илэрхийлж, энэ цаг үед хамтарсан хөдөлмөр эрхэлж байж өрхийн орлогоо нэмэгдүүлэх боломжтойг хэлцгээж байна.