“Ирээдүйн асуудлаарх дээд түвшний уулзалт”-ыг зохион байгуулах санал НҮБ-ын Ерөнхий нарийн бичгийн даргын “Бидний нийтлэг зорилго” илтгэлд туссан бөгөөд энэ жилийн чуулга уулзалтыг “Илүү сайхан маргаашийн төлөөх олон талт шийдлүүд” сэдвийн дор 2024 оны есдүгээр сарын 22-23-ны өдрүүдэд Нью-Йорк хотноо зохион байгуулж байна.
Тус чуулганы үеэр Гадаад харилцааны сайд Б.Батцэцэг “Тогтвортой хөгжлийн зорилтууд ирээдүйн төлөөх НҮБ-ын Ерөнхий нарийн бичгийн дарга Антонио Гутеррешийн дэвшүүлж байгаа санаачилгыг Монгол Улс хэрэгжүүлж байгааг нотлохын зэрэгцээ манай улсын хийж хэрэгжүүлж байгаа ажлыг дурдсан. Мөн дэлхийн эмэгтэйчүүдийн форумыг саяхан монгол улсад зохион байгуулсан. Энэ форумын үр дүнд гарсан төгсгөлийн баримт бичигт ирээдүйн төлөөх зорилтуудад тусгагдсан санаа, зорилтуудыг дэмжиж, монгол улс санаачилгатай ажиллаж байгаагаа илэрхийллээ.
Чуулганд НҮБ-ын гишүүн 193 улсын төлөөлөл ирсэн. Өнөөдрийн байдлаар чуулганд 80-аад орны ерөнхийлөгч, бусад улсын гадаад хэргийн сайдууд оролцож байна. Энэхүү чуулганы үеэр айлчлал хийхгүйгээр төрийн тэргүүнүүд болон гадаад хэргийн сайдууд уулзаж, хоёр талын уулзалтыг зохион байгуулдгаараа ач холбогдолтой. Манай орны хувьд далайд гарцгүй. Нислэгийн хувьд хязгаарлагдмал хол орон зай туулдаг. Тиймээс бидэнд олон улсын түвшний гадаад харилцааны ололт, амжилтуудаа бататгах, өмнөх айлчлалын үеэр хэлж ярьсан зүйлсийг үргэлжлүүлэн хэлэлцэхэд энэхүү чуулган чухал талбар болж байна. “Ирээдүйн асуудлаарх дээд түвшний чуулга уулзалт”-д манай улсын ерөнхийлөгч монгол улсын байр суурь, тогтвортой хөгжлийн зорилтуудыг хэрэгжүүлэхтэй холбоотой уур амьсгалын өөрчлөлт , хүний эрх, хүйсийн тэгш харилцаа зэрэг олон чиглэлээр ахиц дэвшил гарч байгааг дурдахын зэрэгцээ хэрэгжүүлж болохуйц чухал санаачилгуудыг дэвшүүлнэ. Ерөнхий Ассамблейн дээд хэмжээний уулзалтаар төрийн тэргүүнүүдийн хэлсэн үгнүүд төгсгөлийн баримт бичигт тусгагдаж, олон тогтоолыг энэ үеэр баталдаг.Тус чуулганы үеэр төрийн тэргүүнүүд улс орныхоо зорилго, зорилт болон олон улсын хамтын ажиллагааны хүрээг харуулсан чухал үг хэлдэг. Энэ үгэнд ач холбогдол өгч, дүн шинжилгээ хийдэг. Тиймээс манай улс “Ирээдүйн асуудлаарх дээд түвшний чуулга уулзалт”-д идэвхтэй оролцдог” хэмээв.
