Б.Мөнхбаатар: Ханбогдын туршлагаар дараагийн 3 хотыг байгуулна

Өмнөговь аймгийн Ханбогд сумыг 2040 он хүртэл хот болгон хөгжүүлэх ерөнхий төлөвлөгөөг өнөөдөр байгуулж хөрөнгө оруулгагч Оюутолгой компани болон Засгийн газар, орон нутгийн удирдлагын төлөөллүүд хамтран ажиллах гэрээ байгуулсан.

Хот байгуулах төлөвлөгөөний талаар Барилга, хот байгуулалтын сайд Б.Мөнхбаатар “Бид олон ажлын байр үүсгэх хотыг байгуулах нь чухал. Иймд Оюутолгойг түшиглэн Ханбогд, Тавантолгойг түшиглэн Цогтцэций, Гурван тэс, Сайншанд гэсэн хотуудыг хамгийн түрүүнд байгуулах ёстой. Гэхдээ хот байгуулах нь усны нөөц бүрдүүлэхээс эхэлнэ. Түүний араас ус цэвэрлэх байгууламж болон цахилгаан хангамжийг шийднэ. Ингэхдээ сэргээгдэх эрчим хүчийг нүүрстэй хослуулан цахилгааныг шийдэж болно. Энэ аргаар шийдэж болох цөөн газруудын нэг нь Ханбогд. Үйлдвэрийн ажилчид Ханбогдод тав тухтай амьдрах нөхцөлийг бүрдүүлэхийн тулд сургууль цэцэрлэг нэн тэргүүнд байх хэрэгтэй.

Хүн амын хувьд 15 мянгаас дээш байж сая хот болдог. Ханбогдын хүн амыг 20 мянгаас дээш гарна гэж тооцоолсон. Ханбогдод хэрэгжүүлсэн туршлагыг дараагийн шинэ хотуудад хэрэгжүүлнэ. Өнөөдөр ерөнхий төлөвлөгөөг баталлаа. Цаашдаа нарийн төлөвлөгөөнүүдийг боловсруулж, засаг захиргааны өөрчлөлтүүдийг ч хийнэ. Хот байгуулна гэдэг өнөө маргаашдаа шийдчих асуудал биш” гэсэн юм.

Гэхдээ өнөөдөр зөвхөн Ерөнхий төлөвлгөөг быаталж байгаа ч хүмүүсийн сэтгэлд нэн таатай, яг өнөөдр шинэ хотоо нээж, хүлээж авч байгаа мэт сэтгэгдэл төрж буй бололтой ерөөл магтаалын үгс ч урсаж байлаа.