Л.Оюун-Эрдэнэ: Иргэд маань шинэ амьдралын хэв маяг руу шилжиж байна

Өнөөдөр Засгийн газар ээлжит бусаар хуралдаж Нэг хаалга-Нэг шинжилгээ” арга хэмжээний үр дүн болон вакцинжуулалтын талаар мэдээлэл өглөө.

“Нэг хаалга-нэг шинжилгээ” амжилттай үргэлжилж, дуусах шатандаа орлоо. Иргэд маань маш идэвхитэй хамрагдаж, төр засагтайгаа хамтарч ажиллаж чадсан нь хамгийн чухал үр дүн байв. Бид 411 мянган сорьц авна гэж анх төлөвлөж байсан бол өнөөдрийн байдлаар 461 мянгад хүрчээ. Дүүрэг, хороо тус бүрийн шинжилгээний нарийвчилсан дүн, мэдээ болон УОК, Эрдэмтдийн зөвлөлийн шийдвэрийг үндэслэн Улаанбаатар хотын халдварын зэрэглэлийг өндөр эрсдэлтэй буюу “УЛААН” өнгөөс “ШАР” өнгө болгон бууруулах тогтоолыг өнөөдөр Засгийн газар ээлжит бусаар хуралдаж баталлаа.
Ингэснээр шинэ, идэвхитэй, эрүүл амьдралын хэв маяг руу МОНГОЛ улс шилжиж байна.
Энэ үеэр Ерөнхий сайд Л.Оюун-Эрдэнэ: “Төлөвлөгөөний дагуу нөгөөдрөөс хүн амын 60 хувь буюу 18-аас дээш насны иргэдээ вакцинд хамруулах ажил эхэлнэ. Үүнд ч гэсэн иргэд маань ухамсартай хандаж, идэвхитэй хамрагдана гэдэгт итгэлтэй байна. Вакцинжуулалттай холбоотой зөв мэдээллийг иргэдэд өгөх тал дээр улсын болон нийслэлийн онцгой комисс, Засгийн газрын гишүүд онцгой анхаарч ажиллах хэрэгтэй. Иргэд маань шинэ амьдралын хэв маяг руу шилжиж байна. Маскаа зүүгээд, дархлаагаа дэмжээд, вакцинжуулалтыг дэмжээрэй” гэв.