Тавантолгой-Гашуунсухайт чиглэлийн 208.5 км төмөр замын барилгын ажлыг ирэх сарын 15-наас үргэлжлүүлж 2021 онд ашиглалтад оруулахаар болжээ. Төмөр замын суурь бүтцийн барилгын ажлын зөвшөөрлийг “Тавантолгой төмөр зам” ХХК-д олгож, суурь бүтэц, барих, ашиглахад шаардагдах хөрөнгийг тухай бүр техник, эдийн засгийн үндэслэлд заасан дүнгээр нүүрс урьдчилан борлуулах болон бусад эх үүсвэрээс санхүүжүүлж байхаар шийдвэрлэсэн байна. Мөн инженерийн байгууламж, эрчим хүч, усан хангамж, өртөө, зөрлөгийн болон дохиолол холбоо, бусад барилга байгууламж барихад шаардагдах зөвшөөрлийг тухай бүр нь шуурхай олгож байхыг Өмнөговь аймгийн Засаг дарга Н.Наранбаатарт үүрэг болгожээ.“Тавантолгой төмөр зам” ХХК-ийн хувьцааны 66 хувийг “Эрдэнэс Тавантолгой” ХК-д, 34 хувийг “Монголын төмөр зам” ТӨХК-д эзэмшүүлэхээр болсон. Тавантолгой-Гашуунсухайт чиглэлийн төмөр зам нь Өмнөговь аймгийн Цогтцэций, Баян-Овоо, Ханбогд сумын нутгаар дайран өнгөрөх бөгөөд 30 сая тонн коксжих болон эрчим хүчний нүүрс тээвэрлэн экспортлох боломжтой. 2013-2015 онд замын доод бүтцийн ажлын 51.8 хувь, газар шорооны ажлын 86.6 хувь, гүүр, хоолойн ажлын 52 хувийг хийж гүйцэтгэсэн. Гэсэн ч санхүүжилтгүйн улмаас 2015-2018 онд ажил нь зогсоод байсан юм.

Тавантолгойгоос Гашуунсухайт хүртэл авто замаар нүүрс тээвэрлэхэд өртөг нь тонн тутамд 30-32 ам.доллар байдаг. Төмөр замтай болсноор үнэ хоёр дахин буюу 14.9 ам.доллар болж буурах юм.  Уг зам болон бусад асуудлаар Зам тээвэр, хөгжлийн сайд Б.Энх-Амгалан мэдээлэл хийв. “Тавантолгой, Гашуунсухайтын төмөр зам өмнө нь хийж байсан ажил тул хуучин байсан кэмп дээр нь байрлаад ажлаа эхлүүлнэ. Гурван кэмп байгаа. Замын ажлыг ирэх сарын 15-наас үргэлжлүүлнэ.  Харин Тавантолгой, Зүүнбаянгийн чиглэлийн төмөр замын ажил ид өрнөж байна. Долоон худаг гаргахаас дөрвийг нь гаргасан. Гурван худгийн ажил дуусах шатандаа байгаа. Ингэхээр усны асуудал шийдэгдсэн. 90 км замын ажил мөн шийдэгдсэн. Зам дээр найман компани туслан  гүйцэтгэгчээр ажиллаж байгаа. Зэвсэгт хүчний 77, 81 дүгээр ангийн алба хаагчид ажиллаж байгаа. Баасан гарагт төмөр замын ажилтай танилцана” гэв.

Тэрбээр,  үргэлжлүүлэн шинээр баригдаж буй авто замтай холбоотой мэдээлэл өгөв. Налайх болон Дарханы замын ажил хэвийн үргэлжилж байгаа гэнэ. Мөн Баян-Өлгий чиглэлийн замын тендер удахгүй зарлагдахаар бэлдэж байгааг хэллээ.

Leave a Reply

Your email address will not be published. Required fields are marked *

Previous post Засгийн газрын хуралдаанаар “Ирээдүйн өв сан корпораци” ХХК байгууллаа
Next post Иргэдийн ая тухтай амьдрах нөхцлийг зөрчсөн 5423 асуудал байна

More Stories