Хууль бусаар байгалийн өнгөт чулуу олборлож байсан бүлэг этгээдийг саатуулжээ

Он гарсаар цагдаагийн газарт энэ төрлийн гэмт хэрэг эхний тохиолдол юм байна. Зөрчил гаргасан эдгээр хүмүүсийн ашиглаж байсан багаж хэрэгсэл, мөн өнгөт чулууг, унаж явсан машиныг улсын орлого болгож, 150 нэгж буюу 150,000 төгрөгөөр торгоно гэлээ. Мөн байгалийн өнгөт чулуу нь Хэнтий аймгийн Баянмөнх, Бор-өндөр, Бэрх, Норовлин, Баянхутаг, Батноров, Хэрлэн сумын нутаг дэвсгэрт ихээр байдаг бөгөөд нутгийн иргэд ухахаас гадна баруун аймгийн иргэд, Улаанбаатар хотын иргэд найз нөхдөөрөө нийлэн ийнхүү байгалийг сүйтгэсээр байгаа юм.

Иргэд зөвшөөрөлгүйгээр байгалийн өнгөт чулуу эрэх , хайх, түүх үйл ажиллагаа явуулж “Ашигт малтмалын тухай” хуулийн 7 дугаар зүйлийн 7.3-т Бичил уурхайгаар ашигт малтмал олборлохоос бусад тохиолдолд тусгай зөвшөөрөлгүйгээр ашигт малтмал эрэх, хайх, ашиглахыг хориглоно. Байгалийн өнгөт болон үнэт чулууг түүх, олборлох үйл ажиллагааг ердийн ашигт малтмалын адил тусгай зөвшөөрлийн үндсэн дээр эрхэлнэ гэсэн заалтыг зөрчиж байна гэлээ. Торгуулийн хэмжээ маш бага, торгох, чулууг хураах төдийд л арга хэмжээ авдаг бөгөөд өөр ямар нэгэн чанга хариуцлага байхгүйг албаны хүн хэлж байлаа.