Байгалийн гамшигт үзэгдлийн хохирлыг арилгахад нэг тэрбум 400 сая төгрөг шаардагдана

Байгалийн гамшигт үзэгдлийн хор хөнөөлийг арилгахад авч хэрэгжүүлсэн арга хэмжээний талаар Улсын Онцгой комиссын нарийн бичгийн дарга, хурандаа М.Энх-Амар мэдээлэл хийлээ. Тэрээр ” Баруун бүсийн эрчим хүчний системд гарсан гэмтлийг засварлах 391 сая төгрөг болон гамшигт эд хөрөнгөөрөө хохирсон 168 айлд гэр олгох, тээвэрлэн хүргэх зардлууд нийлээд нэг тэрбум 400 сая төгрөгийн асуудлыг Засгийн газрын хуралдаан шийдвэрлэлээ.

Өнөөдөр 10.50 минутад цахилгаан дамжуулах 2 дахь тулгуур баганаа босгосон. Одоо нэг тулгуур багана босгох ажил үлдээд байна. Маргааш гэхэд хэвийн ажиллагаанд орно. Цаг агаарын нөхцөл байдлын тухайд орон нутагт цас бударсан хүйтэн байгаа учраас ажил гүйцэтгэхэд нэлээд хүндрэлтэй байна. Тулгуур багана ачиж тээвэрлэдэг авто машин Монголд гурав байдаг. Холын зай туулан тээвэрлэлт хийнэ гээд бодит хүндрэлүүд байгаа ч өмнөх сэргээн засварлалтын хугацаатай харьцуулахад Онцгой байдлын алба , цагдаа, Эрчим хүчний яам, аймаг, сумдын онцгой байдлын албад маш богино хугацаанд арга хэмжээ авч чадсан.

10 жилийн давтамжтайгаар салхины хурд ажиглагдаж байгаа. Иймд цахилгаан дамжуулах агаарын шугам барих гэрээнд ашиглалтын баталгаат хугацааг уртасгах боломжийг судлан 30-40 м/секундэд тулгуур баганууд унахгүй байх хэмжээний шаардлага тавихыг Эрчим хүчний сайдад даалгасан” гэв.

Арванхоёрдугаар сарын нэгнээс баруун аймгуудын нутгаар, 2-ны өдөр ихэнх нутгаар цас орж, салхины хүч 18-24 м/сек хүрч ширүүснэ гэсэн урьдчилсан мэдээ байна. Онцгой байдлын алба Ус цаг уурын байгууллагатай хамтран арваннэгдүгээр сарын 30-нд хэвлэлийн бага хурал хийн нарийвчилсан мэдээг иргэд олон нийтэд хүргэх юм байна.

Мөн тэрээр “Одоогийн байдлаар дөрвөн аймагт дулааны цахилгаан станц, эмнэлэг зэрэг онцгой обьектуудыг эрчим хүчээр хангасан ч 46 сум тоггүй байгаа. Нэг тулгуур багана угсрах ажил үлдсэн учраас маргааш гэхэд хэвийн үйл ажиллагаанд шилжинэ гэж харж байгаа” гэв.