Олон улсын шатрын холбоо (FIDE)-ноос БНХАУ-ын Засаг захиргааны онцгой бүс Хонконгт рапид болон блиц төрлийн дэлхийн аварга шалгаруулах багийн тэмцээнийг зохион байгуулах гэж байна.
Маргааш эхлэх тус тэмцээнд манай улсаас гурван баг оролцохоор өнөөдөр орой Хонконгийн зүг хүлгийн жолоо залах ажээ. Зургаан өдөр үргэлжлэх энэхүү тэмцээнд “The MongolZ”, “Алдар” спорт хороо, “Босоо Ноён” гэсэн гурван баг өрсөлдөхөөр бэлтгэлээ хангаж дуусав.
Дэлхийн аварга шалгаруулах багийн тэмцээн нь орчин үеийн шатрын ертөнцийн хамгийн өрсөлдөөнтэй, үзүүштэй тэмцээнүүдийн нэг бөгөөд дэлхийн өнцөг булан бүрээс шилдэг их мастерууд, үндэсний шигшээ багууд, мэргэжлийн клубүүдийг нэг дор цуглуулдгаараа онцлогтой. Энэ нь шатрын спорт дахь багийн нэгдэл, стратегийн ур чадвар, өрсөлдөөний дээд түвшнийг илтгэдэг онцгой ач холбогдолтой тэмцээн юм. Богино хугацааны хяналттай рапид, блиц төрлөөр явуулдаг тул тоглолт бүр хурд, ур чадвар, багийн нягт уялдаа холбоог сорьсон оюуны тулаан болно.
Уг тэмцээнд манай гурван багаас гадна Монголын шатрын холбооны ерөнхийлөгч Г.Занданшатар Германы тэрбумтан Вадим Розенштайны урилгаар “WR Chess”-ийн бүрэлдэхүүнд багтаж, ДАШТ-д өрсөлдөхөөр Хонконгт очжээ. Монголоос оролцох багуудын бүрэлдэхүүнийг танилцуулъя.
The MongolZ баг
Дасгалжуулагч: ФИДЕ мастер Б.Ану
1-р ширээ-их мастер Д.Батсүрэн
2-р ширээ-олон улсын мастер Х.Итгэлт
3-р ширээ-олон улсын мастер Ү.Агьбилэг
4-р ширээ-олон улсын мастер Х.Өлзийхишиг
5-р ширээ-олон улсын мастер Б.Баярмаа
6-р ширээ-А.Эрхэмбаяр
“Алдар” спорт хорооны баг:
1-р ширээ-их мастер С.Билгүүн
2-р ширээ-олон улсын мастер Г.Амартүвшин
3-р ширээ-олон улсын мастер С.Чингүүн
4-р ширээ-их мастер Б.Мөнгөнтуул
5-р ширээ-олон улсын мастер Б.Мөнгөнзул
6-р ширээ-Б.Цогтбаяр
“Босоо Ноён” шатрын клубын баг:
(2000 хүртэл чансаатай сонирхогчдын ангилал)
1-р ширээ-спортын мастер А.Золжаргал
2-р ширээ-дэд мастер Б.Очирсүх
3-р ширээ-ФИДЕ мастер Б.Хүслэнзаяа
4-р ширээ-дэд мастер Н.Очирваань
5-р ширээ-спортын мастер Ж.Мичид
6-р ширээ-дэд мастер М.Батням
Ташрамд дурдахад, өнгөрсөн жилийн ДАШТ-д Монгол Улсын Үндэсний шигшээ баг 2400 хүртэл чансаатай багуудын ангилалд түрүүлж, дэлхийн аваргын цомыг эх орондоо авчирч байсан түүхтэй.
