Халдлага үйлдсэн 14 настай сэжигтний аавыг баривчилжээ

Жоржиа мужийн Апалачи ахлах сургуульд галт зэвсгийн халдлага үйлдэж дөрвөн хүний аминд хүрсэн 14 настай сэжигтний аавыг уг хэрэгтэй холбогдсон гэх үндэслэлээр баривчилсан байна. Түүнийг Колин Грей гэх бөгөөд 54 настай. Жоржиа мужийн Мөрдөн байцаах товчооны мэдээлснээр, Колин Грейг дөрвөн хүний амь насыг санаатайгаар хөнөөсөн, хоёрдугаар зэргийн хүн амины хэрэг үйлдсэн гэх хоёр, хүүхдэд харгис хэрцгий хандсан найман зүйл ангид буруутгаж байна.

Түүний хүү Колт Грей нь Апалачи ахлах сургуульд сурдаг байсан бөгөөд Лхагва гаригт “AR” загварын буу ашиглаж сургуулийн бүсэд зэвсгийн халдлага үйлдсэн.

Улмаар хоёр сурагч, хоёр багш амиа алдаж, өөр зургаан сурагч, нэг багш хүнд гэмтсэн байна. Колт Грейг нэгдүгээр зэргийн аллага үйлдсэн гэх дөрвөн зүйл ангид буруутгаж байгаа ба насанд хүрсэн хүний хувиар шүүх юм. Аав нь хүүдээ галт зэвсэг бэлэглэсэн, зэвсэг биедээ авч явж байсныг нь мэдэж байсан гэх үндэслэлээр хэрэгт холбогдоод байгаа аж.

Колин Грэй мөрдөн байцаалтын үеэр “AR” загварын бууг 2023 оны арванхоёрдугаар сард зул сарын бэлэг болгон хүүдээ өгсөн гэдгээ хэлжээ.

Буу бэлэглэхээс хэдэн сарын өмнө нэрээ нууцалсан цахим хаягаас Апалачи сургуульд халдлага үйлдэнэ гэх заналхийлэл цахим орчинд тавигдаж байсан. Холбооны мөрдөх товчоо тухайн үед нэрээ нууцалсан цахим хаяг нь Колт Грей гэж мэдэж байсан ч баривчлах, урьдчилан сэргийлэх гэх мэт арга хэмжээ аваагүй юм.

Эх сурвалж: CNN