Хууль бусаар эзэмшсэн газруудыг чөлөөлөх, авто гражуудыг буулгах захирамж гаргав

Завхан аймгийн Засаг дарга Г.Өнөрбаяр өнөөдөр /2024.08.27/ Улиастай хотын өнгө үзэмж, тохижилтыг сайжруулах, аймгийн төвийн инженерийн шугам сүлжээ бүхий газарт зөвшөөрөлгүй газар эзэмшсэн, хотын хөгжлийн ерөнхий төлөвлөгөөг зөрчсөн, эзэмшил газартаа зориулалтын дагуу үйл ажиллагаа явуулаагүй, зохих албан тушаалтны зөвшөөрөлгүйгээр хайс, авто граж, контейнер, түц, барилга байгууламж барьсан, хашаа сунгасан зэрэг зөрчлийг арилгах үүднээс дээр дурдсан зөрчлүүдийг гаргасан иргэн, аж ахуйн нэгж, байгууллагын эзэмшил газрын захирамжийг хүчингүй болгож, газрыг албадан чөлөөлөх тухай захирамж гаргаж ажлын хэсэг байгуулав.

Газар чөлөөлүүлэх мэдэгдэлд заасан хугацаанд газрыг чөлөөлөөгүй иргэн аж ахуйн нэгж, байгууллагын газрыг албадан чөлөөлөх арга хэмжээг 2024 оны 8 дугаар сарын 26-ний өдрөөс 10 дугаар сарын 01-ний өдөр хүртэлх хугацаанд зохион байгуулж, газрыг албадан чөлөөлөхтэй холбогдон гарах хөрөнгө, машин механизм, харуул хамгаалалт бүхий склад, аж ахуйн хашаагаар хангаж ажиллах, газар чөлөөлөх үед иргэдийн зүгээс саад бэрхшээл учруулсан тохиолдолд нийтийн хэв журам сахиулах хууль тогтоомжийн дагуу арга хэмжээ авч ажиллахыг ажлын хэсэгт үүрэг болголоо.