“Хүмүүст 100,000-1,0 сая төгрөг амлаж регистрийн дугаар цуглуулсан байна”

“Үнэн ба зөв” намаас УИХ-ын 9 дүгээр тойрогт нэр дэвшигч Ч.Баттунхаг, 11 дүгээр тойрогт нэр дэвшигч З.Гэрэлт-Од нарын хүмүүс мэдээлэл хийлээ. Тэд мэдээллийн эхэнд энэ удаагийн сонгууль шударга болохгүй, ард түмний төлөөлөл болсон иргэд төрд очихгүй бол Үндэсний аюулгүй байдал, тусгаар тогтнол алдагдахад хүрээд байна гэв.

Нэр дэвшигчдийн зөвлөх менежер “Нэр дэвшигчид сонгуулийн сурталчилгаагаа явуулж байгаа. Тэд нэрийн хуудсан дээрээ гар утасны дугаараа бичсэн. Гэтэл тэр дугаарт асар олон дуудлага ирсэн. Энэ дуудлага нь “Та нар хэзээ мөнгөө өгөх вэ. Би та нарт 10-30 регистрийн дугаараа өгсөн, энэ мөнгө хэзээ орох вэ” гэж асуусан. Эхлээд бид үүнийг явуулга гэж ойлгосон. Гэвч энэ нь хэд, хэдэн удаа давтагдсан тул анхаарал хандуулж эхэлсэн.

Ингээд тэр утсаар ярьж байгаа хүмүүстэй очиж уулзаад хэн, хаанаас мөнгө амлаж, юу ярьсан тухай тодруулсан. Нэр дэвшигч З.Гэрэлт-Одын нэрийг барьж хүмүүсийн регистр, оршин суугаа хаяг,  утасны дугаарыг авсан байсан. Ингээд 100 мянгаас 1 сая төгрөг амлаж хүмүүсийн регистрийн цуглуулсан байна.

Сонгууль болоод дуусна. Үүний дараа манай нэр дэвшигчээс “Та нөгөө мөнгөө хэзээ өгөх вэ” гэж нэхэх нөхцөл үүсээд байна” гэлээ.

УИХ-ын 11 дүгээр тойрогт нэр дэвшигч З.Гэрэл-Од  “Би СХД нэр дэвшиж байгаа. Дүүргийн нийт ард түмэн минь ээ, манай намын бүх залуус “мөнгөгүй сонгууль” хийж байгаа. Бид нэг ч хүнд мөнгө амлаж, регистрийн дугаар, нэр хаяг аваагүй. Цаашид бид ядаж сонгуулиа зөв хийдэг болох ёстой. Тиймээс биднийг дэмжээрэй” гэв.

УИХ-ын 9 дүгээр тойрогт нэр дэвшигч Ч.Баттунхаг  “Бичил хороололд мөнгө тарааж байна гэх мэдээлэл хүлээн авсан. Намыг нь хэлээд юу гэх вэ. Энэ зүйлүүдээ болих хэрэгтэй байна. Шударга сонгууль хиймээр байна. Залуусыг дэмжээрэй л гэж хүсье даа” гэлээ.