Эрүүгийн цагдаагийн албаны Кибер гэмт хэрэгтэй тэмцэх газрын дарга, цагдаагийн дэд хурандаа С.Тайван:
Кибер гэмт хэрэгтэй тэмцэх хэлтсийг газар болгосон. Кибер гэмт хэргийн 98 хувь бусдын нэр дээр нээсэн арилжааны банкны дансыг ашиглаж үйлдэж байгаа. Виртуаль хэтэвч, бусдын нэр дээр нээсэн үүрэн холбооны утасны дугаар, мөн хуурамч хаяг ашиглаж үйлдэж байна. Онцлох хэргүүдээс дурдвал 17 настай иргэн Ш 283 иргэний цахим хаягийг хакердаж, 29 иргэнээс 13 сая төгрөг шилжүүлж авсан нь тогтоогдсон.
Энэхүү хэргийн хохирогч иргэн Б-гээс тодруулахад “Манай танил эгчээс “чам руу дөрвөн оронтой тоогоо андуураад явуулчихлаа” эгч рүүгээ явуулаад өгөөч гэсэн чат ирсэн. Юм бодолгүй утсан дээр ирсэн мессежээ явуулахад тун удалгүй фэйсбүүк рүүгээ нэвтэрч чадахаа больсон. Тэгээд эгч рүүгээ залгаад тань руу код явуулсны дараа фэйсбүүк рүүгээ орж чадахаа болилоо гэхэд эгч маань “Миний фэйсбүүк өчигдөр хакердуулсан. Хүн амьтнаас мөнгө зээлээд байгаа сурагтай” гэсэн. Тэгсэн манай найз нөхөд залгаж, чиний фэйсбүүкээс бие муу байна мөнгө зээлээч гэсэн мессежүүд ирлээ. Бие нь зүгээр үү гэж асуусан. Зарим найз нөхөд, ах дүүс маань мөнгө шилжүүлсэн байсан. Тэгээд цагдаагийн байгууллагад хандсан” гэсэн юм.
+ There are no comments
Add yours